كوشەنى كەز كەلگەن جەردەن كەسىپ وتكەن جەتى مىڭعا جۋىق شىمكەنتتىك ايىپپۇل تولەدى
شىمكەنتتىك پاترۋلدىك پوليتسيا پولكىنىڭ قىزمەتكەرلەرى جىل باسىنان بەرى جاياۋ جۇرگىنشىلەردىڭ جول قوزعالىس ەرەجەلەرىن بۇزعان 6930 ازاماتتى انىقتاپ، تيىسىنشە زاڭعا سايكەس اكىمشىلىك حاتتاما تولتىرعان.
اتالعان ازاماتتار قازاقستان رەسپۋبليكاسى اكىمشىلىك قۇقىق بۇزۋ تۋرالى كودەكسىنىڭ 615-بابى بويىنشا جاۋاپكەرشىلىككە تارتىلدى.
«ايتا كەتەيىك، زاڭناماعا سايكەس بۇل قۇقىقبۇزۋشىلىق 2 ا ە ك مولشەرىندە ايىپپۇل سالۋعا اكەپ سوعادى. وسى رەتتە جاياۋ جۇرگىنشىلەر مەن كولىك تىزگىندەگەن جۇرگىزۋشىلەرگە جول ۇستىندە ءوز ءومىرىن قاتەرگە تىكپەۋگە جانە ءتيىستى ەرەجەلەر مەن ساقتىق شارالارىن قاتاڭ ۇستانۋعا كەڭەس بەرەمىز» - دەلىنگەن شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
