جەكە تۇلعالاردىڭ تەڭگەدەگى دەپوزيتتەرى بويىنشا سىيلىقاقى تولەۋ قاعيدالارى ازىرلەندى

استانا. قازاقپارات - «جەكە تۇلعالاردىڭ ۇلتتىق ۆاليۋتادا (تەڭگەمەن) ورنالاستىرىلعان دەپوزيتتەرى بويىنشا وتەماقى (سىيلىقاقى) تولەۋ قاعيدالارىن بەكىتۋ تۋرالى» قازاقستان ۇكىمەتىنىڭ قاۋلى جوباسى جاريالاندى، دەپ حابارلايدى قازاقپارات ءتىلشىسى.

اشىق نورماتيۆتىك-قۇقىقتىق اكتىلەر پورتالىندا جاريالانعان قاۋلى جوباسىندا دەپوزيتورعا (سالىمشىعا) وتەماقى (سىيلىقاقى) تولەۋ 2022-جىلعى 23- اقپانداعى وپەراتسيالىق كۇننىڭ سوڭىنداعى جاعداي بويىنشا قولدانىستا بولعان وتەلەتىن دەپوزيتتەگى اقشا سوماسىنا ءاربىر قاتىسۋشى بانكتە 20000000 (جيىرما ميلليون) تەڭگە شەگىندە جۇزەگە اسىرىلاتىندىعى كورسەتىلگەن.

دەپوزيتوردا (سالىمشىدا) ءبىر قاتىسۋشى بانكتە بىرەۋدەن ارتىق وتەلەتىن دەپوزيت بولعان كەزدە وتەماقى (سىيلىقاقى) تولەۋ وسىنداي قاتىسۋشى بانكتەگى وتەلەتىن دەپوزيتتەردە 20000000 (جيىرما ميلليون) تەڭگە شەگىندەگى جالپى اقشا سوماسىنا جۇزەگە اسىرىلادى.

«وتەماقى (سىيلىقاقى) تولەۋ دەپوزيتوردىڭ (سالىمشىنىڭ) قايتىس بولۋىن قوسپاعاندا، وتەماقىنى (سىيلىقاقىنى) تولەۋ قاعيدالارىنىڭ وسى تارماعىنا سايكەس ءوز كەلىسىمىن راستاعان دەپوزيتورلارعا (سالىمشىلارعا) 2023-جىلعى 10- اقپاننان كەشىكتىرمەي ءوتىنىش ارقىلى جۇزەگە اسىرىلادى. دەپوزيتور (سالىمشىنىڭ) قايتىس بولعان جاعدايدا، 2023-جىلعى 10- اقپانعا دەيىن راستايتىن قۇجاتتاردى (قايتىس بولۋ تۋرالى كۋالىكتى) ۇسىنعان كەزدە وتەماقى (سىيلىقاقى) تولەۋ ءۇشىن ءوتىنىش بەرۋ تالاپ ەتىلمەيدى»، - دەلىنگەن قاۋلى جوباسىندا.

جوبا 2023-جىلدىڭ 10- قاڭتارىنا دەيىن قوعامدىق تالقىلاۋدا بولادى.