وسكەمەن- زايسان اۋە باعىتىنداعى رەيس سانى ارتتى

استانا. قازاقپارات- جولاۋشىلار تاسىمالى وبلىستىق بيۋدجەت ەسەبىنەن سۋبسيديالانىپ، رەيس سانى ەكى ەسە كوبەيتىلدى. سونداي- اق، زايسان اۋەجايى قايتا جاڭارتۋدان وتەدى. العاشقى جۇمىستار باستالىپ تا كەتتى.

وسكەمەن- زايسان باعىتىنداعى ۇشاق اۋەگە كوتەرىلدى. ۇزاقتىعى 1 ساعات. ءىشى جولاۋشىعا تولى. ءبىرى قۇجات جۇمىستارىمەن جۇرسە، ەندى ءبىرى تۋىس- تۋعانىنا بارا جاتىر..

باقىتجان بەيسەنبايەۆا ءسىڭىلىسى سىرقاتتانىپ، وسكەمەنگە شۇعىل كەلگەن بولاتىن. ەندى ۇيىنە قايتىپ بارادى. 600-800 شاقىرىمداعى زايسانعا تاكسيمەن جەتۋدىڭ ازاپ ەكەنىن ول جاقسى بىلەدى. سوندىقتان وسى ۇشاق قاتىناسى ۇزىلمەسە ەكەن دەيدى.

باقىتجان بەيسەنبايەۆا جولاۋشى:

- سامولەت جاقسى نارسە عوي، ءبىر ساعاتتا كەلەسىڭ، ءبىر ساعاتتا قايتا ۇشاسىڭ جۇمىستى دا بىتىرەسىڭ، تاكيسمەن بالەنباي ساعات جۇرەسىڭ انا جولى 11 ساعات ءجۇرىپ ارەڭ جەتتىك. سامولەت جاقسى، ءجيى بولسا، رەيستەر كوبەيسە.

تاكسي دەمەكشى، جاقىندا بۇقتىرمانى مۇز ۇستىمەن توتەلەي كەسىپ وتپەك بولعان كولىك سۋعا كەتتى. جۇرگىزۋشى زايسانعا دەيىنگى جامان جولدان قاشام دەپ، باسىن قاتەرگە تىككەن. 4 ادام امان قالىپ، ءبىر ادام كوز جۇمعان ەدى. وسىنداي وقيعالاردىڭ ارى- بەرى اعىلعان جۇرتتى الاڭداتارى ءسوزسىز. سوندىقتان قولجەتىمدى بيلەت قۇنىمەن اۋە باعىتىن ساقتاپ قالۋدىڭ ماڭىزى زور دەيدى ولار. الايدا قازىر زايسان اۋەجايىنىڭ جاعدايى ءماز ەمەس. ۇشۋ - قونۋ جولاعى قىسقا. عيمارات ەسكىرگەن. جولاۋشىلاردى كۇتۋ ورىندارى تار. انا مەن بالا بولمەسى دەگەن اتىمەن جوق.

ەرمەك تۇرسىنوۆ، زايسان اۋەجايىنىڭ باسشىسى:

- سوڭعى رەت 1984 -جىلى كۇردەلى جوندەۋ وتكەن. ودان بەرى اعىمداعى رەمونتتارمەن عانا تۇرعان. قازىر قۇرىلىس، كۇردەلى جوندەۋ جۇمىستارى وتە قاجەت بولىپ تۇر. زايسان تۋريستىك پوتەنسيالى جوعارى اۋدان. كولى دە، ءشولى دە، نۋ ورمانى دا بار. ال اۋەجاي ولكە تۋرالى ەڭ ءبىرىنشى اسەر قالدىراتىن نىسان.

اەليتا احمەتسالىم قىزى، وبلىستىق ماسليحات دەپۋتاتى:

- ءبىزدىڭ اۋەجاي وتە كەلبەتتى بولۋى كەرەك، ادەمى بولۋى كەرەك، جارقىراپ تۇرۋى كەرەك. باسقا جاقتان كەلگەن قوناقتارىمىز زايساندا قانداي اۋەجاي بار، شىعىس قازاقستاندا قانداي ادەمى جەر بار دەپ ايتۋ كەرەك. بيىل وسكەمەن زايسان تاسىمالى ءۇشىن 175 ميلليون تەڭگەگە جۋىق قاراجات ءبولىندى.

بيلەت قۇنى 10 مىڭ تەڭگە. بۇرىن اپتاسىنا ەكى- اق رەت قاتىنايتىن ۇشاق قازىر 4 رەت ۇشىپ ءجۇر. ەندى اۋەجايدى قايتا جاڭعىرتۋ بويىنشا باستى قۇجات تا راسىمدەلىپ جاتىر ەكەن.

نۇرجان ءجۇمادىلوۆ، ش ق و جولاۋشى كولىگى جانە اۆتوموبيل جولدارى باسقارماسىنىڭ باسشىسى:

- جوبالىق سمەتالىق قۇجات جاساۋعا وبلىس اكىمى تاپسىرماسىمەن 38 ميلليون تەڭگە قارجى بولىنگەن، ونىڭ كونكۋرستىق پروتسەسى ءوتتى، جوبالىق سمەتالىق قۇجات دايىن بولعاننان كەيىن، وسى ايروپورتتىڭ جۇمىسى قايتا جاڭعىرتۋعا تۇراتىن بولادى. اۋەجاي 2025 -جىلى جوندەلىپ ءبىتۋى كەرەك. ۇشۋ جولاعى 1500 مەتردەن 2100 مەترگە ۇزارادى. دەمەك، 80 ادامدىق ۇلكەن ۇشاقتاردى دا قابىلداي الادى. ەندەشە بولاشاقتا الماتى، استانا قالاسىنا رەيس اشىلۋى دا ابدەن مۇمكىن.

www.24.kz