تۇرمەدە وتىرعانداردى اسىراۋعا قانشا قارجى جۇمسالادى

ول تۋرالى قازاقپارات ساۋالىنا بەرىلگەن ق ر ىشكى ىستەر مينيسترلىگىنىڭ رەسمي جاۋابىندا ايتىلعان.

«تۇرمەدە وتىرعان ءبىر سوتتالۋشى، كۇدىكتى نەمەسە ايىپتىنى اسىراۋعا جىلىنا ورتا ەسەپپەن 789000 تەڭگە جۇمسالادى. ونىڭ ىشىندە 443000 تەڭگەگە ازىق- تۇلىك الىنادى. جازاسىن وتەۋشىلەرگە جۇمسالاتىن شىعىن سوماسىنا تاماق، ءدارى- دارمەك، توسەك- ورىن، گيگيەنا قۇرالدارى، كوممۋنالدىق تولەم جانە بوستاندىققا شىققانداردىڭ جولپۇلى كىرەدى»، - دەگەن جاۋاپ بەرىلدى ساۋالعا.

سونداي- اق، رەسمي اقپاراتتا سوتتالعاندارعا كاسىبي ءبىلىم بەرۋ، ەڭبەكپەن قامتۋ جۇمىسى تۋرالى ايتىلعان.

«قىلمىستىق- اتقارۋ جۇيەسى مەكەمەلەرىندە ورتا جانە كاسىپتىك ءبىلىم الۋعا جاعداي جاسالعان. ياعني تۇرمەلەردە كاسىبي ءبىلىم بەرەتىن 50 مەكتەپ بار، وندا جىلىنا 1,9 مىڭنان استام ادام ءتۇرلى كاسىپتى مەڭگەرىپ شىعادى. ماماندىقتاردىڭ اراسىندا اعاش ۇستاسى، سانتەحنيك، ەلەكتر جانە گازبەن دانەكەرلەۋشى، تىگىنشى، اسپاز جانە تاعى باسقا. ءبىلىم بەرۋمەن قاتار قىلمىستىق- اتقارۋ جۇيەسى مەكەمەلەرىندە ەڭبەكپەن قامتۋ دا قاراستىرىلعان. جۇمىس ىستەۋگە نيەتتى جانە ەڭبەككە جارامدى جانداردىڭ تابىس تابۋ مۇمكىندىگى بار. سونىمەن قاتار بوستاندىققا شىققان جازاسىن وتەۋشىنىڭ قوعامعا قايتا بەيىمدەلۋى مەن جۇمىسپەن قامتىلۋى ءبىزدىڭ نازاردا. بۇل باعىتتا بىزدە ارنايى ازىرلەنگەن كەشەندى ستراتەگيا بار»، - دەيدى ۆەدومستۆودان.

ىشكى ىستەر مينيسترلىگىنىڭ مالىمەتىنشە، سوتتالعانداردى الەۋمەتتەندىرۋگە باعىتتالعان 63 جوبا ىسكە اسىرىلدى.

بۇعان دەيىن حابارلاعانىمىزداي، ەلىمىزدە جىل سايىن شامامەن 15 مىڭ ادام تۇرمەگە قامالادى.

ىشكى ىستەر مينيسترلىگىنىڭ مالىمەتىنشە، قازىر تۇرمەلەردە 28 مىڭ ادام جازاسىن وتەپ جاتىر. سونداي- اق، جىل سايىن شامامەن 6265 ادام تۇرمەدەن شىعادى.

ايتا كەتسەك، بۇگىندە ەل اۋماعىندا 79 جازاسىن وتەۋ مەكەمەسى بار. ولار قىلمىس دەڭگەيىنە قاراي ءىشىنارا بولىنەدى.

سونىمەن قاتار، تۇرمەلەردە ەر، ايەل، كامەلەت جاسىنا تولماعاندار مەن جۇقپالى اۋرۋعا ۇشىراعاندار بولەك ۇستالادى.

اۆتور

داۋلەت ىزتىلەۋ