ەكى جىگىت ءتۇن ورتاسىندا قارۋمەن ۇستالدى

اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، 1-قازاننان بەرى «كيىك» كەڭ اۋقىمدى اكسياسى ءوتىپ جاتىر.

«بۇل اكسيانىڭ ماقساتى - كيىك اتۋدىڭ جولىن كەسۋ، ونىڭ ونىمدەرىن زاڭسىز دايىنداۋمەن، ساتۋمەن اينالىساتىن ادامداردى انىقتاۋ. پوليتسيا قىزمەتكەرلەرى اتىراۋ وبلىسىنىڭ اۋماعىمەن وتەتىن «استراحان- اقتوبە» تاسجولىنىڭ بويىندا تۇنگى ساعات 01:30 شاماسىندا «LADA» كولىگىن توقتاتىپ، تەكسەرۋ جۇرگىزدى. كولىكتە 1994 جانە 1991 -جىلعى جىگىتتەر بولعان. ولار 12-كاليبرلى ەكى ۇڭعىلى ءۇش قارۋ مەن 1 دانا فريسكاتەلدى، سويىلعان 2 قويان ەتىن الىپ كەلە جاتقان»، - دەپ حابارلادى دەپارتامەنتتىڭ باسپا ءسوز قىزمەتى.

قازىر اتالعان دەرەككە قاتىستى ق ر قىلمىستىق كودەكسىنىڭ 337-بابىنىڭ 3-بولىگىمەن سوتقا دەيىنگى تەرگەپ-تەكسەرۋ باستالدى.

«پوليتسيا قىزمەتكەرلەرى «كيىك» اكسياسى اياسىندا اتىراۋ قالاسىنىڭ ماڭىنداعى دامبى، امانگەلدى، جامبىل، پەشنوي ەلدى مەكەندەرىندە رەيد وتكىزدى. رەيد كەزىندە وسىمدىكتەردىڭ نەمەسە جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن، سونداي-اق پايدالانۋعا تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ دەرەگىنە قاتىستى 21 قۇقىق بۇزۋشىلىق انىقتالدى. زاڭناما تالابىن بۇزعان 19 ادامعا 230 مىڭ تەڭگەنىڭ ايىپپۇلى سالىندى»، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.

«كيىك» كەڭاۋقىمدى اكسياسى 31-جەلتوقسانعا دەيىن جالعاسادى.

ەسكە سالا كەتەلىك، بۇدان بۇرىن اتىراۋ وبلىسىنىڭ تۇرعىنىنان 8 كيىكتىڭ ءمۇيىزى تاركىلەنگەنىن حابارلاعان بولاتىنبىز.