الەمگە جاڭا قازاقستاندى تانىتقىمىز كەلەدى - پرەزيدەنت تەلەراديوكەشەنى ديرەكتورىنىڭ ورىنباسارى
«قازاقستان رەسپۋبليكاسى پرەزيدەنتىنىڭ تەلەراديوكەشەنى - ەلىمىزدىڭ اقپارات كەڭىستىگىندەگى ءارتاراپتاندىرىلعان، بىرنەشە مەدياكومپانيالاردىڭ باسىن ءبىر ارناعا توعىستىرعان، قۇرىلىمى مەن قۇزىرەتى ەرەكشە بىرەگەي حولدينگ. ءبىز بيىلعى جىلدان باستاپ، بىرنەشە ۇلكەن كومپانيالاردى ءوزىمىزدىڭ مەديا اكتيۆكە بىرىكتىردىك. جەكەلەپ ايتار بولساق، بۇل مەدياقۇرىلىم اكتيۆتەرىنە ەل اۋماعىندا تاۋلىك بويى حابار تاراتاتىن «Jibek Joly» تەلەارناسى، ودان كەيىن حالىقارالىق كەڭىستىككە تارايتىن «SilkWay» ارناسى جانە «Kazinform» حالىقارالىق اقپارات اگەنتتىگى، KazTube مەدياپلاتفورماسى جانە «دەرەكتى فيلمدەر ورتالىعى» كىرەدى»، - دەدى تىلەگەن ابىشيەۆ.
ونىڭ ايتۋىنشا، ءتيىمدى ءارى بىرەگەي مەدياپلاتفورما قۇرۋ ءۇشىن اقپاراتتىق كەڭىستىك كەز كەلگەن سۇرانىمعا ساي بولۋى ءتيىس.
«جوبالارعا جەكە-جەكە توقتالساق، بيىل ءبىز «Jibek Joly» تەلەارناسى سىندى جاڭا ارنانىڭ قالىپتاسۋىنا كۇش جۇمسادىق. بار-جوعى 4 ايدىڭ ىشىندە «Jibek Joly» ارناسىنىڭ جۇمىسىن باستاعالى بىرنەشە جانردا حابارلار تۇسىردىك. وتباسىلىق تەلەارنا بولعاندىقتان، اقپاراتتىق، ساراپتامالىق، توك-شوۋ تانىمدىق جانردى قامتيتىن 15 جاڭا باعدارلاما ەفيرگە شىقتى. حابار تاراتۋ تاۋلىك بويى جۇزەگە اسىرىلادى. وعان قوسا، تەلەارنا ءوز اۋديتورياسىنا الەمدىك، وتاندىق كينويندۋستريانىڭ تانىمال تۋىندىلارى مەن ءتۇرلى تەلەحيكايالار جانە كىشكەنتاي كورەرمەندەر ءۇشىن مۋلتفيلمدەر ۇسىنىپ كەلەدى. ءبىر سوزبەن ايتقاندا، كەز كەلگەن جاستاعى كورەرمەن ءوز تانىم-تالعامىنا ساي ونىمدەردى ەفيردەن كورە الادى»، - دەدى سپيكەر.
سونىمەن بىرگە پرەزيدەنت تەلەراديوكەشەنىنە قاراستى «SilkWay» حالىقارالىق تەلەارناسى الەمنىڭ 120 ەلىنە قازاق، ورىس، اعىلشىن، قىرعىز، وزبەك تىلدەرىندە دۋبلياج ارقىلى حابار تاراتادى. بيىلعى ساۋىردەن باستاپ، ارنا ەفيرى 70 پايىزعا جاڭارتىلدى، جاڭا جوبالار قوسىلدى، وعان قوسا ارنادا اعىلشىن تىلىندە كۇنىنە 4 مارتە حابار تاراتاتىن جاڭالىقتار باعدارلاماسى دا شىعا باستادى.
«پرەزيدەنت تەلەراديوكەشەنى شەت مەملەكەتتەردەن، سونىڭ ىشىندە قازاقستاننىڭ سىرتقى ساياسي مۇددەلەرىنە باسىمدىق بەرەتىن ايماقتاردا تەلەارنانىڭ ۇزدىك جوبالارىن جانە ونىڭ كەڭ تاراۋىنا، جۇيەلى جۇمىس ىستەۋىنە ىقپال جاساپ كەلەدى. قازىرگى ۋاقىتتا پرەزيدەنت تەلەراديوكەشەنى «SilkWay» تەلەارناسىنىڭ وتاندىق مەديانارىقتاعى ۇزدىك جوبالارىن، قىرعىزستاننىڭ اقپارات كەڭىستىگىنە تارالۋىن جۇزەگە اسىرۋدى اياقتادى، ەندى ناقتى كەلىسسوزدەر جۇرگىزىپ جاتىر»، - دەدى ت. ابىشيەۆ.
ال «Kazinform» حالىقارالىق اقپارات اگەنتتىگى - ەلىمىزدەگى مەديانارىقتا جاريالانۋ جاعىنان ەڭ ۇلكەن، ەڭ ءىرى ينتەرنەت-اقپارات قۇرالى. اگەنتتىك كۇن سايىن جۇزگە جۋىق اقپاراتتى 5 تىلدە - قازاق، ورىس، اعىلشىن، قىتاي، وزبەك تىلدەرىندە جانە توتە جازۋ مەن لاتىن قارپىندە جاريالاپ كەلەدى.
«Kazinform» حالىقارالىق بىرلەستىكتەردىڭ بەلسەندى مۇشەسى رەتىندە شەتەلدىك جۋرناليستەر مەن ب ا ق وكىلدەرىنىڭ قاتىسۋىمەن وتكەن «Belt and Road News Network» اتتى بايقاۋدا قازىلار القاسىنا مۇشەلىك ەتىپ، استراحاندا وتكەن كاسپيي ەلدەرى مەديافورۋمى مەن تاشكەنتتە وتكەن ورتاازيالىق ساراپشىلار فورۋمىنا قاتىستى. وسىلايشا ءوزىنىڭ حالىقارالىق اقپاراتتىق نارىقتاعى بەلسەندىلىگىن ارتتىرۋدى جوسپارلاپ وتىر.
سونداي-اق تەلەراديوكەشەن وكىلى ەلدەگى وقيعالار الەمگە اشىق ايتىلىپ، ءوز تۇسىنىگىندە جەتكىزىلۋى كەرەگىن باسا ايتتى.
«ويتكەنى ءبىزدىڭ ەلدەگى ۇستانىم ۋاقىت وتكەن سايىن الەمدىك قاۋىمداستىقتىڭ قىزىعۋشىلىعىن ارتتىرىپ كەلەدى. جاڭعىرۋ مەن جاڭارتۋعا قادام جاساعان سايىن قىسقا كۇندە قىرىق قۇبىلاتىن قازىرگى الەمدە مەديا سالاسىنا دەگەن تالاپ پەن تىلەك كۇشەيىپ كەلەدى. سوندىقتان ءبىز وسى تالاپتىڭ ۇدەسىنەن شىعا وتىرىپ، قازاقستاننىڭ عانا ەمەس، احمەت بايتۇرسىنوۆ ايتقانداي، بۇكىل ايماقتىڭ كوزى، قۇلاعى ءھام تىلىنە اينالۋدى كوزدەيمىز. ءبىزدىڭ ماقسات - قازاقستاننىڭ كۇن تارتىبىندەگى ماسەلەلەردى جاھاندىق دەڭگەيدە ناسيحاتتاي وتىرىپ، ءار ۇلت پەن ەلگە قىمبات، ادامزاتقا ورتاق قۇندىلىقتاردى دارىپتەۋدەن دە ارىلمايتىن ارنا بولۋ. ءبىز الەمگە جاڭا قازاقستاندى تانىتۋدى جوسپارلاپ وتىرمىز. ەندەشە وسى جايلى بارىنشا شىنايى ايتىلعان ءجون دەپ سانايمىز»، - دەدى تىلەگەن ابىشيەۆ.
ايتا كەتەيىك، 20-21- جەلتوقسان كۇندەرى استانادا ءبىرىنشى ورتالىق ازيا مەديافورۋمى وتەدى. فورۋمدا مەديا ماماندار مەن تانىمال ساراپشىلار وڭىردەگى مەديانى دامىتۋدىڭ وزەكتى ماسەلەلەرىن تالقىلاپ، ورتالىق ازيادا ورتاق مەديا كەڭىستىك قۇرۋ يدەياسىن ساراپتايدى.
