اتاۋلى الەۋمەتتىك كومەك الاتىنداردىڭ بانكروتتىق جاريالاۋىنا بولادى

استانا. قازاقپارات - اتاۋلى الەۋمەتتىك كومەك الىپ جۇرگەن قازاقستاندىقتاردىڭ بانكروتتىق جاريالاۋىنا بولادى.

بۇل تۋرالى قارجى ۆيتسە- ءمينيسترى ەرجان ءبىرجانوۆ ءمالىم ەتتى، دەپ حابارلايدى قازاقپارات ءتىلشىسى.

«اتاۋلى الەۋمەتتىك كومەكتى 6 اي بويى العان ازامات ءوزىن بانكروت دەپ جاريالاي الادى. زاڭ جوباسىن ازىرلەۋ بارىسىندا جۇمىس توبى مەن دەپۋتاتتار وسىنداي ۇسىنىس جاسادى. اتاۋلى الەۋمەتتىك كومەك الاتىن ازامات ءوزىن بانكروت دەپ جاريالاعىسى كەلسە، ونىڭ اتىندا جەكە مۇلىك بولماۋى ءتيىس. سونىمەن قاتار، بانككە بەرەشەگى بولسا، ەسەپ ايىرىسۋ ءراسىمىن جۇرگىزۋى قاجەت»، - دەدى ەرجان ءبىرجانوۆ سەناتتا وتكەن ازاماتتاردىڭ تولەم قابىلەتتىلىگى جانە بانكروتتىعى تۋرالى زاڭ جوباسىن تالقىلاۋعا ارنالعان جيىن بارىسىندا.

ونىڭ ايتۋىنشا، سوتتان تىس بانكروتتىق تەك بانكتەر، ميكروقارجى ۇيىمدارى مەن كوللەكتورلىق اگەنتتىكتەر الدىنداعى بەرەشەگى بويىنشا جۇرگىزىلەدى.

بۇعان دەيىن ەرجان ءبىرجانوۆ ەلىمىزدە نەسيە جانە باسقا دا قارىزىن تولەمەي جۇرگەن 7 ميلليون بورىشكەر بارىن ءمالىم ەتتى.

سونىمەن قاتار، جيىن بارىسىندا اليمەنت كەشىرىلەتىن قارىزدار قاتارىنا جاتپايتىنى ايتىلدى.

ال، بانكروت بولىپ تانىلعان ازاماتتارعا 5 جىلعا دەيىن نەسيە بەرىلمەيدى.