نەسيە تاريحىن جاقسارتۋ جولدارى
مۇندا ءبىرىنشى كەزەكتە نەسيە تاريحى بۇزىلىپ، كەلەسى رەت نەسيە الۋ مۇمكىندىگىنەن ايىرىلىپ قالاتىن جاعدايلار بولادى. ەندەشە، نەسيە تاريحىن جاقسارتۋدىڭ قانداي جولدارى بار؟
نەسيە تاريحى - ءسىز العان نەسيەلەر تۋرالى بارلىق اقپاراتتار. نەسيە تاريحى تەك بانكتەر ءۇشىن ەمەس، ءسىز ءۇشىن دە ماڭىزدى. ەگەر نەسيە تاريحىڭىز جاقسى بولسا، قوماقتى سوماداعى نەسيەنى وڭاي الاسىز. ال ەگەر ناشار بولسا، كەرىسىنشە، سىزگە نەسيە بەرىلمەيدى. نەسيە تاريحى ءبىرىنشى كرەديتتىك بيۋرودا 10 جىل بويى ساقتالادى. ءتىپتى، 10 جىل وتكەننەن كەيىن دە ارحيۆتە تىركەۋدە تۇرا بەرەدى، ءبىراق قۇنىن جوعالتادى.
نەسيە تاريحىن قالاي تەكسەرەمىز؟
ءار ازامات ءوز نەسيە تاريحىن تەكسەرىپ، باعالاي الادى. ونىڭ بىرنەشە جولى بار. قازىر ەلىمىزدە ەكى نەسيە بيۋروسى جۇمىس ىستەيدى، ءبىرى - مەملەكەتتىك، ەكىنشىسى - جەكەمەنشىك. مەملەكەتتىك نەسيە ەسەبىن تەكسەرۋ ءۇشىن egov.kz پورتالىنا كىرىپ، «سالىق پەن قارجى» بولىمىندەگى «ەكونوميكا مەن قارجى» پاراقشاسىنا ءوتۋ كەرەك. وندا «جەكە كرەديتتىك ەسەپ الۋ» باتىرماسىن باسىپ، ەلەكتروندى-ساندىق قولتاڭبامەن راستاپ، انىقتاما الا الاسىز.
ال ءبىرىنشى كرەديتتىك بيۋرو جىلىنا ءبىر رەت تەگىن نەسيەلىك ەسەپ الۋعا مۇمكىندىك بەرەدى. ول ءۇشىن ۇيىم سايتىنا كىرىپ، ونداعى نۇسقاۋلىقتاردى ورىنداۋ ارقىلى ەسەپپەن تانىسۋعا بولادى. وعان دا ەلەكتروندى-ساندىق قولتاڭبا قاجەت.
نەسيە تاريحى جوق بولسا...
ومىرىندە ەشقاشان نەسيە الماعان ادامدار دا بار. ءبىراق بانك مۇنداي ادامدارعا ءىرى نەسيە بەرمەي قويۋى ابدەن مۇمكىن. سەبەبى بانك ءۇشىن ونىڭ قانداي ادام ەكەنى بەلگىسىز. سوندىقتان ءىرى نەسيە (يپوتەكا، اۆتونەسيە) الاتىن ويىڭىز بولسا، الدىن-الا نەسيە تاريحىن قۇرۋدى ويلاعان ءجون. ول ءۇشىن بىرنەشە شاعىن نەسيە الىپ، ۋاقىتىلى جاۋىپ تاستاساڭىز بولادى. ەڭ باستىسى، بانك ءسىزدىڭ ادال جانە جاۋاپتى كليەنت ەكەنىڭىزگە كوز جەتكىزۋى كەرەك.
نەسيە تاريحىن جاقسارتۋ جولدارى
نەسيە تاريحىن تولىقتاي تۇزەۋ مۇمكىن ەمەس. سەبەبى جوعارىدا ايتقانداي، نەسيەنى ۋاقىتىلى تولەمەسەڭىز، بۇل اقپاراتتاردىڭ بارلىعى نەسيە تاريحىڭىزدا جازىلىپ تۇرادى. ونى وشىرە المايسىز. ءبىراق ونى جاقسارتۋعا بولادى. كرەديتتىك رەيتينگ دەگەن بار. ول ءسىزدىڭ قانشا كرەديتتى ۋاقىتىلى جاپقانىڭىزعا بايلانىستى وزگەرىپ تۇرادى. سوندىقتان نەسيە تاريحىن كەزەڭ-كەزەڭمەن جاقسارتۋعا كىرىسىڭىز.
بىرىنشىدەن، قولدانىستاعى پروبلەمالىق كرەديتتى جابىڭىز. ەگەر نەسيەنى بىردەن جابۋعا مۇمكىندىگىڭىز بولماسا، بانككە بارىپ، نەسيە بەرۋ شارتىن وزگەرتۋدى سۇراڭىز. مىسالى، ايلىق اقشاسىن ازايتىپ، ۋاقىتىن سوزۋ نەمەسە كەرىسىنشە، ايلىق اقشاسىن كوبەيتىپ، ۋاقىتىن ازايتۋ. الايدا قارىزدان قۇتىلعاننان كەيىن دە نەسيە تاريحىڭىز بىردەن وزگەرە قويمايدى. ول ءۇشىن ءبىراز ۋاقىت ءوتۋى كەرەك.
ەكىنشى جولى - ميكروكرەديت الۋ. از سوماعا نەسيە راسىمدەپ، ونى اي سايىن ۋاقىتىنان بۇرىن نەمەسە ۋاقىتىلى تولەپ وتىرىپ، جابىڭىز. وسىلايشا، بىرنەشە رەت ميكروكرەديت الىپ، ۋاقىتىلى جاۋىپ، كەيىن سوماسى كوپتەۋ نەسيە راسىمدەپ كورىڭىز. ءبىراق مۇنداي جاعدايدا ونى اي سايىن تولەي الاتىنىڭىزعا سەنىمدى بولۋىڭىز كەرەك.
قورىتىندىلاي كەلسەك، ءار ادام نەسيە الۋعا جاۋاپكەرشىلىكپەن قاراۋ كەرەك. قازىر ويلانباستان شاعىن نەسيەلەر الىپ، ونى تولەي الماي، نەسيە تاريحىڭىزدى ناشارلاتىپ الساڭىز، كەيىن ول يپوتەكامەن ءۇي نەمەسە اۆتوكولىك الۋعا كەدەرگى بولادى.
massaget.kz
