الماتىدا جەڭىل كولىك كوپىردەن قۇلاپ كەتتى - ۆيدەو
سالدارىنان ءۇش ادام زارداپ شەكتى، دەپ حابارلايدى قازاقپارات ءتىلشىسى.
جول اپاتىنىڭ ۆيدەوسى الەۋمەتتىك جەلىدە تارادى.
الماتى قالالىق پوليتسيا دەپارتامەنتىنىڭ مالىمەتىنشە، وقيعا تۇنگى ساعات 01:50 دە الاتاۋ اۋدانىندا بولعان.
«2002 -جىلى تۋعان Toyota Camry كولىگىنىڭ جۇرگىزۋشىسى رىسقۇلوۆ داڭعىلى بويىمەن باتىس باعىتتا، كۇدەرين كوشەسىنىڭ قيىلىسىندا، ءرولدى باسقارا الماي، جول وتپەسىنىڭ باتىس جاعىنان مەتالل قورشاۋ - كەدەرگىگە سوعىلىپ، ودان ءارى كوپىردەن اۋدارىلىپ كەتكەن»، - دەپ حابارلادى الماتى پوليتسياسىنان.
وقيعا سالدارىنان جۇرگىزۋشى ءتۇرلى دەنە جاراقاتىن الىپ، قالاداعى اۋرۋحانالاردىڭ بىرىنە جەتكىزىلدى.
«سونىمەن قاتار، ونىڭ ەكى جولاۋشىسى 1999 -جىلى تۋعان ازامات گ. مەن 2003 -جىلى تۋعان ازامات ك. مەديتسينالىق كومەككە جۇگىنىپ، اۋرۋحاناعا جەتكىزىلدى. بۇل دەرەكتى الاتاۋ اۋدانىنىڭ پوليتسيا قىزمەتكەرلەرى وندىرىسكە الدى»، - دەپ اتاپ ءوتتى ۆەدومستۆودان.
