اليمەنت كەشىرىلەتىن قارىز تۇرىنە جاتپايدى - مينيسترلىك

استانا. قازاقپارات - ادام دەنساۋلىعىنا زيان كەلتىرۋ جانە اليمەنت بويىنشا بەرەشەك كەشىرىلەتىن قارىزدارعا جاتپايدى.

بۇل تۋرالى ق ر قارجى ۆيتسە-ءمينيسترى ەرجان ءبىرجانوۆ ءمالىم ەتتى، دەپ حابارلايدى قازاقپارات ءتىلشىسى.

«ازاماتتاردىڭ تولەم قابىلەتتىلىگى جانە بانكروتتىعى تۋرالى زاڭ جوباسىن ازىرلەۋ بارىسىندا اتالعان ينستيتۋت قالىپتاسقان ەلدەردىڭ تاجىريبەسى سارالاندى. مىسالى، گەرمانيا جانە ا ق ش-تا بانكروت بولعان تۇلعاعا 10 جىل نەسيە الۋعا تىيىم سالىنادى. ال رەسەيدە 5 جىلعا دەيىن جەكە كاسىپكەرلىكپەن اينالىسپايدى، باسشىلىق لاۋازىمعا تاعايىندالا المايدى. حالىقارالىق تاجىريبەنى ەسكەرە وتىرىپ، راسىمدەردىڭ 3 ءتۇرىن ەنگىزۋدى ۇسىنىپ وتىرمىز»، - دەدى ەرجان ءبىرجانوۆ سەنات قابىرعاسىندا وتكەن دوڭگەلەك ۇستەل بارىسىندا.

وسى تۇستا ەسكە سالساق، تاياۋدا عانا ق ر پرەمەر-ءمينيسترىنىڭ ورىنباسارى-قارجى ءمينيسترى ەرۇلان جاماۋبايەۆ بانكروتتىق راسىمدەر تۋرالى بايانداعان ەدى.

«4,9 ميلليون تەڭگەدەن اساتىن قارىز جانە باسقا دا بەرەشەك تۇرلەرى بويىنشا ازاماتتار سوت بانكروتتىعىنا جۇگىنە الادى. بۇل ءراسىم بارىسىندا بورىشكەردىڭ مۇلكى اۋكتسيوندا ساتۋعا قويىلادى. تۇسكەن قاراجات سول ازاماتتىڭ كرەديتورلار الدىنداعى قارىزىن وتەۋگە جۇمسالادى. بورىشكەردىڭ قالعان وتەلمەگەن سوماسى كەشىرىلەدى. الايدا، باسقا ادامنىڭ ءومىرى مەن دەنساۋلىعىنا كەلتىرىلگەن زيان مەن اليمەنت بويىنشا قارىز ەسەپتەن شىعارۋعا جاتپايدى»، - دەيدى ول.