كەلەسى جىلى بەلارۋستە ۇ ق ش ۇ- نىڭ بىرلەسكەن جاتتىعۋلارى وتەدى
بۇل پىكىردى ۇجىمدىق قاۋىپسىزدىك تۋرالى شارت ۇيىمىنىڭ باس حاتشىسى ستانيسلاۆ زاس ايتتى، دەپ حابارلايدى قازاقپارات ءتىلشىسى.
«Sputnik» اقپاراتتىق اگەنتتىگىنىڭ باسپا ءسوز ورتالىعىندا بەينەكوپىر فورماتىندا وتكەن باسپا ءسوز ءماسليحاتىندا ۇ ق ش ۇ باس حاتشىسى ۇيىمنىڭ وتكەن جىلعى قىزمەتىنىڭ قورىتىندىلارى، ۇجىمدىق قاۋىپسىزدىك كەڭەسىنىڭ ەريەۆاندا وتكەن كەزەكتى سەسسياسىنىڭ ناتيجەلەرى تۋرالى ايتىپ بەردى.
جۋرناليستەر سۇراعىنا جاۋاپ بەرە وتىرىپ، س. زاس بىتىمگەرشىلىك كۇشتەردىڭ قازىرگى كونتينگەنتى كەز كەلگەن قاۋىپ-قاتەرگە قارسى تۇرۋعا جەتكىلىكتى ەكەنىن اتاپ ءوتتى.
«سونىمەن بىرگە، ءبىز قاجەت بولعان جاعدايدا بىتىمگەرشىلىك كۇشتەرىمىزدىڭ ۇلكەن توبىن دا جەدەل تۇردە تاسىمالداي الاتىنىمىزدى جاقسى تۇسىنەمىز. ول ءۇشىن بىزدە ءبارى بار»، - دەيدى ۇ ق ش ۇ باس حاتشىسى.
س. زاس 2023-جىلى بەلارۋس اۋماعىندا ۇ ق ش ۇ- نىڭ ءبىرقاتار بىرلەسكەن جاتتىعۋلارى وتەتىنىن ەسكە سالدى. ونىڭ ايتۋىنشا، وقۋ-جاتتىعۋ بارىسىندا ۇيىمدى نىعايتۋ، ونىڭ جاۋاپكەرشىلىك ايماعىندا تۇراقتىلىق پەن قاۋىپسىزدىكتى قامتاماسىز ەتۋ ماقساتىندا ۇ ق ش ۇ- عا مۇشە مەملەكەتتەردىڭ بىرلىگىن ارتتىرۋ جانە ولاردىڭ اراسىنداعى قايشىلىقتاردى رەتتەۋ بويىنشا ماڭىزدى ىرگەلى مىندەتتەر شەشىلەدى.
«العاش رەت تۋىنداعان پروبلەمالاردى رەتتەۋ جانە ۇ ق ش ۇ- عا مۇشە مەملەكەتتەردىڭ اۋماعىندا تۇراقسىزداندىرۋعا جول بەرمەۋ ماڭىزدى باسىمدىق رەتىندە تۇجىرىمدالىپ وتىر»، - دەدى ستانيسلاۆ زاس.
ايتا كەتەيىك، قازاقستاندا ءار جىلدارى ۇكىمەت باسشىسى، مەملەكەتتىك حاتشى، پرەزيدەنت اكىمشىلىگىنىڭ باسشىسى سەكىلدى جوعارى لاۋازىمدى قىزمەتتەر اتقارعان يمانعالي تاسماعامبەتوۆ 2023-جىلدىڭ 1-قاڭتارىنان باستاپ ۇ ق ش ۇ- نىڭ باس حاتشىسى بولادى جانە بۇل قىزمەتتى ءۇش جىل اتقارادى.
