الماتىدا اسقازانىنان پاكەت تابىلعان قار بارىسى ءولىپ قالدى
الماتى قالالىق زووباقتىڭ مالىمەتىنشە، 8- جەلتوقسان كۇنى ىلە-الاتاۋ ۇلتتىق ساياباعىنىڭ اۋماعىنان السىرەگەن قار بارىسى تابىلعان.
ونىڭ جاعدايى مۇشكىل بولىپ، قاتتى ازىپ، ارىقتاعان. وزىنە جاقىنداعان تەحنيكانىڭ داۋىسىنا دا ءمان بەرمەگەن.
جانۋاردى كەزدەستىرگەن ساياباق قىزمەتكەرلەرى دەرەۋ ماماندارعا حابار بەرگەن.
قار بارىسى كەزدەسكەن اۋماققا ىلە-الاتاۋ ۇلتتىق پاركىنىڭ ماماندارى، زوولوگيا ينستيتۋتىنىڭ قىزمەتكەرلەرى، الماتى حايۋاناتتار باعىنىڭ ۆەتەرينارلارى ارنايى بارعان.
«جانۋاردىڭ جاعدايى وتە اۋىر ەكەنى بەلگىلى بولدى. سول جەردە كومەك كورسەتۋ مۇمكىن بولماعاندىقتان، ءدال دياگنوز قويۋ ءۇشىن جانۋاردىڭ دەنەسىنەن زەرتتەۋگە قاجەتتى جاعىندىلار (پ ت ر سىناعى ءۇشىن) جانە قان سىنامالارى الىندى. ماماندار السىرەگەن جانۋاردى الماتى زووباعىنا جەتكىزۋ تۋرالى شەشىم قابىلدادى. وكىنىشكە قاراي، جانۋار اسا اۋىر جاعدايدا بولعاندىقتان، حايۋاناتتار باعىنا جەتكىزىگەن سوڭ، بارىس ءولىپ قالدى. بارىسقا ىلە الاتۋ ۇلتتىق پاركى، زوولوگيا ينستيتۋتى جانە قازاق ۇلتتىق اگرارلىق زەرتتەۋ ۋنيۆەرسيتەتىندەگى ارىپتەستەرمەن بىرگە پاتولوگيالىق-اناتوميالىق ساراپتاما جاسالدى. قاتتى السىرەپ شارشاۋمەن قوسا، جانۋاردىڭ اسقازانىنان گەلمينتتەردىڭ كوپتىگى، پوليەتيلەن پاكەتى تابىلدى. جاسى ۇلعايعان بارىستىڭ تىستەرى توزىپ، اڭ اۋلاي الماي قالعان. جابايى تابيعاتتىڭ، الاتاۋدىڭ كوركى بولىپ جۇرگەن بارىس ءولىپ قالدى. ونى قۇتقارۋ ءۇشىن قولدان كەلگەندى جاساۋعا تىرىستىق. ءبىراق ءبارى كەش بولدى»، - دەلىنەدى زووباقتىڭ حابارلاماسىندا.
الماتى زووباعى وسى وقيعادان ساباق الىپ، قورشاعان ورتاعا، تابيعاتقا قامقورلىق جاساۋعا شاقىردى.
«تابيعات اياسىنا شىققاندا ادامدار اينالانى لاستاپ، قوقىس تاستاماۋ كەرەك. اسىرەسە، ءتۇرلى تاعامداردىڭ ءيىسى سىڭگەن پوليەتيلەن پاكەتتەر جانۋارلار ءۇشىن وتە قاۋىپتى. جانۋارلارعا قامقور بولىپ، ولاردى قۇتقارۋ - بارشانىڭ مىندەتى مەن جاۋاپكەرشىلىگى. ءبىز بىرگە عانا تابيعاتتى ساقتاي الامىز»، - دەپ حابارلادى زووباق.
