جەر قويناۋىن يگەرۋشىلەردىڭ قىزمەتى عارىشتان باقىلانادى

سول سەبەپتى ولاردىڭ قىزمەتىن باقىلاۋ ءۇشىن عارىشتىق مونيتورينگ ەنگىزىلمەك، دەپ حابارلايدى قازاقپارات.

بۇل تۋرالى پاۆلودار وبلىسىنىڭ حالقىمەن كەزدەسۋدە يندۋستريا جانە ينفراقۇرىلىمدىق دامۋ ۆيتسە-ءمينيسترى دينارا شەگلوۆا ايتتى.

اتالعان كەزدەسۋدە ءوندىرىسى وركەندەگەن ءوڭىر حالقىنىڭ ۆيتسە-مينيسترگە قويعان ساۋالى از بولعان جوق. ماسەلەن، پاۆلودارلىقتاردى جەر قويناۋىن يگەرۋ سالاسىنداعى بەيبەرەكەتتىك الاڭداتىپ وتىر.

وبلىس حالقىنىڭ ايتۋىنشا، «جەر قويناۋى جانە جەر قويناۋىن پايدالانۋ تۋرالى» كودەكستە مەملەكەتتىك باقىلاۋ ءتارتىبى جەتكىلىكتى دەڭگەيدە قاراستىرىلماعان.

«قاعاز جۇزىندەگى باقىلاۋ ءتارتىبىنىڭ سالدارىنان جەر قويناۋىن يگەرۋشىلەر ايىپپۇل جانە باسقا دا اكىمشىلىك جاۋاپكەرشىلىكتەن سىتىلىپ كەلەدى»، دەيدى جەرگىلىكتى حالىق.

بۇل رەتتە ي ي د م باسشىسىنىڭ ورىنباسارى جوعارىدا اتالعان زاڭ قايتا قارالىپ جاتقانىن جەتكىزىپ، اسىرەسە جەر قويناۋىن پايدالانۋشىلاردىڭ قىزمەتىنە قاداعالاۋ جۇرگىزۋگە وزگەرىس ەنگىزۋ كوزدەلىپ وتىرعانىن ايتتى.

«قولدانىستاعى كودەكستە قاجەتتى اقپارات قاعاز جۇزىندە ۇسىنىلىپ كەلگەندىكتەن، ونى قايتا قارستىرۋعا تۋرا كەلىپ وتىر. نەگە دەسەڭىز، ءقازىر بۇل باعىتتا سيفرلى تەحنولوگيالار ەنگىزىلىپ، بارلىق مالىمەت قامتىلعان ارنايى پورتال ىسكە قوسىلۋى ءتيىس. سونداي-اق قاداعالاۋ تارتىبىنە وزگەرىستەر ەنگىزىلەتىن بولادى. ايتالىق، عارىشتىق مونيتورينگ جەر قويناۋى يگەرۋ سالاسىنا باقىلاۋدى كۇشەيتۋگە سەپتىگىن تيگىزبەك. ويتكەنى شىعىس قازاقستان وبلىسىندا جەر قويناۋىن پايدالانۋشىلاردىڭ بەلگىلەنگەن اۋماقتان ارى اسىپ، گەولوگيالىق بارلاۋدان بولەك جەردى يگەرۋگە كىرىسكەن جاعدايلارى بايقالدى. قاجەتتى دەرەكتەرمەن ق ر ي ي د م- ءنى «قازاقستان عارىش ساپارى» ۇلتتىق كومپانياسى قامتىپ كەلەدى. ءبىز ولارعا جەر قويناۋىنا گەولوگيالىق بارلاۋ جۇرگىزۋگە جانە يگەرۋگە ليتسەنزياسى بار بارلىق كومپانيانىڭ جانە بەلگىلەنگەن ۋچاسكەنىڭ ءتىزىمىن بەردىك. سوعان سايكەس بىزگە ءتيىستى اقپاراتتار ۇسىنىلادى. جوعارىدا كەلتىرىلگەندەي، ەلىمىزدىڭ شىعىسىنداعى جاعداي بويىنشا ارنايى كوميسسيا تاعايىندالىپ، ءتيىستى تەكسەرىستەر جۇرگىزىلەدى»، - دەدى د. شەگلوۆا.

وسى ورايدا پاۆلودار وبلىسىندا ماشينا قۇراستىرۋ، مۇناي-حيميا، تاۋ-كەن سەكتورى سىندى ونەركاسىپ تۇرلەرى جولعا قويىلعانىن ايتا كەتۋ كەرەك. بۇل وڭىردەگى كاسىپورىندار ءوندىرىستى زامانۋي تۇرعىدا، اسىرەسە سيفرلى تەحنولوگيالاردىڭ نەگىزىندە دامىتۋعا باسىمدىق بەرىپ كەلەدى. وسى ارقىلى وندىرىستىك پروتسەستى وڭتايلاندىرىپ، جوعارى ەڭبەك ونىمدىلىگىن ارتتىرۋعا جول اشىلىپ وتىر. ايتالىق، 2018-جىلدان بەرى وبلىس اۋماعىندا شامامەن 5 ميلليارد تەڭگە سوماسىنا 30 عا جۋىق جوبا ىسكە اسىرىلىپتى.

سونىمەن بىرگە 2024-جىلى تاعى دا 3 جوبانى جۇزەگە اسىرۋ جوسپارلانعان. ولار ەنەرگيا ۇنەمدەۋ باسقارماسىنىڭ ديسپەتچەرلىك بولىمشەسىن اۆتوماتتاندىرۋعا، سونداي-اق كومپيۋتەرلىك ترەناجەرمەن قىزمەتكەرلەردى اتتەستاتسيالاۋعا دايىندىعىن جەتىلدىرۋگە جانە ت. ب. باعىتتاعى كورسەتكىشتەردى جاقسارتۋعا ارنالعان.

بۇدان باسقا د. شەگلوۆا پاۆلودارلىقتارعا e-Qurylys سيفرلى جۇيەسى ارقىلى ەلىمىزدەگى قۇرىلىس سالاسىن جانداندىرىپ، جۇمىس تيىمدىلىگىن ارتتىرۋ جوسپارلانعانىن ايتىپ بەردى. ال، زياتكەرلىك كولىك جۇيەسى سالىنىپ جاتقان جولداردى باقىلاۋ مەن ساپاسىن جاقسارتىپ، جۇك تاسىمالداۋ پروتسەسىن وڭتايلاندىرۋعا مۇمكىندىك بەرەتىنىن جەتكىزدى.

مەملەكەت باسشىسىنىڭ «ورتالىق اتقارۋشى ورگاندار باسشىلارىنىڭ حالىقپەن كەزدەسۋلەرىن وتكىزۋ تۋرالى» جارلىعىنا سايكەس يندۋستريا جانە ينفراقۇرىلىمدىق دامۋ مينيسترلىگىنىڭ وكىلدەرى ەلىمىزدىڭ وڭىرلەرىنە بارىپ، جەرگىلىكتى حالىقپەن كەزدەسۋلەرى ودان ءارى جالعاساتىن بولادى.