ەلىمىزگە كەلەتىن ەڭبەك ميگرانتتارىن قاداعالاۋ كۇشەيەدى

بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ ايتتى، دەپ حابارلايدى قازاقپارات ءتىلشىسى.

«ەلىمىزدە تاپشى ءارى سىرتتان ءجيى شاقىرىلاتىن ماماندىقتار ءتۇرى بويىنشا شەتەلدەن 100 ۇزدىك ماماندى تارتۋ كوزدەلەدى. وزدەرىڭىز بىلەسىزدەر، قازىر جوعارى تەحنولوگيالاردى پايدالانۋ ارقىلى دۇنيە جۇزىندەگى مەملەكەتتەر ءوندىرىستى دامىتىپ جاتىر. باسەكەگە قابىلەتتى، ساپالى ءونىم شىعارۋ، ەلگە جەتكىزۋ، شەتكە ساتۋ، ول ءۇشىن تەحنولوگيامەن قوسا، ونى بىلەتىن ماماندار قاجەت. ول ماماندار ەلنگە كەلىپ، ءوز ۇجىمىنداعى جەرگىلىكتى ازاماتتاردى ۇيرەتۋ ارقىلى كوپتەگەن جۇمىستاردى العا جىلجىتۋعا بولادى. وسىنىڭ ارقاسىندا قازاقستاندىق جۇمىسشىلاردىڭ كاسىبي بىلىكتىلىگىن كوتەرۋگە مۇمكىندىك بار»، - دەدى ءىلياس يسپانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونداي-اق، كورشى ەلدەردەن، سونىڭ ىشىندە تىركەۋسىز، بەيرەسمي جۇرگەندەردىڭ جۇمىسىن رەتتەۋ، ولاردى ىتركەۋگە الۋ، باقىلاۋ-قاداعالاۋ جۇمىستارى دا قولعا الىنادى.

«قازىرگى ۋاقىتتا ەلىمىزگە شەتەلدىكتەر ۆيزالى جانە ۆيزاسىز ەلدەردەن كەلەدى، ماسەلەن 30 كۇنگە وزبەكستاننان كەلسە، ەۋرازەق ەلدەرىنەن 90 كۇندە دەيىن ۆيزاسىز جۇرۋگە رۇقساتتارى بار. سولاردىڭ قىزمەتى رەتكە كەلتىرىلەدى. بۇل جەردە ايتا كەتەرلىگى، ىشكى ەڭبەك نارىعىن قورعاۋ ءۇشىن ەلىمىزدە كۆوتا بەلگىلەنەدى. ول كۆوتاعا بايلانىستى مەملەكەتتە جوق، تاپشى ماماندار قاجەت بولاتىن جاعدايدى بەكىتەمىز، سول ازاماتتاردى شەتەلدەن شاقىرۋعا مۇمكىندىك بەرىلەدى. بۇل كۆوتا بىلتىرعى جىلمەن سالىستىرعاندا 7 مىڭعا ازايدى، قازىر 21 مىڭ بەكىتىلسە، ناقتى 14 مىڭ 900 ادام شەتەلدەن كەلىپ، رۇقسات الىپ جۇمىس ىستەپ جاتىر. ولار ءارى قاراي جۇمىسىن اتقارىپ، مەرزىمدەرى بىتكەندە ەلدەن شىعارۋ ماسەلەسى قارالادى»، - دەدى سپيكەر.

ەڭبەك مينيسترلىگىنىڭ حابارلاۋىنشا، ەڭ كوپ جۇمىس ىستەيتىندەر قۇرىلىس سالاسىندا - 5910 ادام (40 پايىز)، تاۋ-كەن ونەركاسىبى جانە كارەر قازۋ - 1419 ادام (10 پايىز)، اۋىل، ورمان جانە بالىق شارۋاشىلىعى - 1 146 ادام (8 پايىز) ، كاسىبي، عىلىمي جانە تەحنيكالىق قىزمەت - 1 081 ادام (8 پايىز)، وڭدەۋ ونەركاسىبى - 995 ادام (7 پايىز).

ەڭبەك ميگرانتتارى كەلەتىن نەگىزگى ەلدەر: قىتاي - 3500 ادام، ءۇندىستان - 1731 ادام، تۇركيا - 1642 ادام، وزبەكستان - 1344 ادام، ۇلى بريتانيا - 1112 ادام.

ايتا كەتەيىك، ەڭبەك مينيسترلىگى باسقا دا قۇزىرەتتى مەملەكەتتىك ورگاندارمەن بىرلەسىپ، 2023-2027-جىلدارعا ارنالعان كوشى-قون ساياساتى تۇجىرىمداماسىن ازىرلەدى. ەلىمىزگە ەڭ تاپشى ماماندىقتار بويىنشا 500 مىقتى ماماندى تارتۋ ءۇشىن 7 باعىتتا جۇمىس جۇرگىزىلەدى.