مۇناي باعاسى رەكوردتى دەڭگەيدە قۇلدىراعاننان كەيىن قايتا كوتەرىلدى
دۇيسەنبى كۇنى استانا ۋاقىتى بويىنشا ساعات 10:30 عا دەيىن Brent ماركالى مۇناي فيۋچەرستەرى 41 تسەنتكە نەمەسە 0,5 پايىزعا ءوسىپ، ءبىر باررەلى 76,51 دوللارعا جەتتى.
West Texas Intermediate ماركالى امەريكالىق مۇناي باررەلىنە 71,55 دوللار دەڭگەيىندە ساۋدالاندى. بۇل بۇرىنعى باعالاردان 53 تسەنتكە نەمەسە 0,8 پايىزعا جوعارى.
دۇيسەنبىدە Brent جانە WTI باعاسى ءوستى. ايتا كەتەيىك، وتكەن اپتادا ەكى مۇناي ماركاسى 2021-جىلدىڭ جەلتوقسانىنان باستاپ ەڭ تومەنگى دەڭگەيگە ءتۇسىپ كەتكەن ەدى.
وعان ىقتيمال جاھاندىق رەتسەسسيا مۇنايعا سۇرانىسقا اسەر ەتەدى دەگەن قاۋىپ سەبەپ بولدى.
«مۇناي باعاسى ءوسىپ جاتىر، ويتكەنى Keystone مۇناي قۇبىرى جابىق، قىتاي COVID- تى باقىلاۋدى جەڭىلدەتتى جانە رەسەي ءوندىرىستى قىسقارتۋى مۇمكىن دەگەن قاۋىپ بار»، - دەدى OANDA كومپانياسىنىڭ اعا نارىق تالداۋشىسى ەدۆارد مويا.
قۋاتى تاۋلىگىنە 622 مىڭ باررەلدى قۇرايتىن Keystone مۇناي قۇبىرى - ماڭىزدى ارتەريا، ول كانادالىق اۋىر مۇنايدى البەرتا پروۆينتسياسىنان ا ق ش- تىڭ ورتا باتىسىنداعى جانە مەكسيكا شىعاناعى جاعالاۋىنداعى مۇناي وڭدەۋ زاۋىتتارىنا جەتكىزەدى.
سونىمەن قاتار، الەمدەگى ەڭ ءىرى شيكى مۇناي يمپورتتاۋشىسى قىتاي ءوزىنىڭ كوروناۆيرۋسقا قارسى قاتاڭ ساياساتىن جەڭىلدەتىپ جاتىر.
وسىعان قاراماستان، بەيجىڭدەگى كوشەلەر تىنىش، كوپتەگەن كاسىپورىندار وسى دەمالىس كۇندەرى جۇمىس ىستەمەدى، ال تۇرعىندار قالىپتى جاعدايعا ورالۋعا ءالى كوپ ۋاقىت قاجەت دەيدى.
جۇما كۇنى رەسەي پرەزيدەنتى ۆ. پۋتين الەمدەگى ەڭ ءىرى ەنەرگيا رەسۋرستارىن ەكسپورتتاۋشى ءوزىنىڭ ەلى ءوندىرىستى قىسقارتىپ، G7 ەلدەرى كەلىسكەن رەسەي ەكسپورتىنا «ويعا قونىمسىز» باعا شەگىن بەلگىلەپ، كەز كەلگەن مەملەكەتكە مۇناي ساتۋدان باس تارتۋى مۇمكىن ەكەنىن مالىمدەدى.
