الماتىدا اقىلى اۆتوتۇراقتاردىڭ مەملەكەتتىك ءبىرىڭعاي وپەراتورى قۇرىلدى

الماتى. قازاقپارات - «الماتى پاركينگىندە» ءبىرىڭعاي وپەراتورى قۇرىلىپ، كاسىپورىن ديرەكتورى تاعايىندالدى. بۇل تۋرالى قالالىق موبيلدىلىك باسقارماسى ءمالىم ەتتى، دەپ حابارلايدى قازاقپارات ءتىلشىسى.

ۆەدومستۆو مالىمەتىنشە، كولىك تۇراقتارىن ودان ءارى كۇتىپ ۇستاۋ ءۇشىن ارنايى باعدارلاما ازىرلەۋ جۇمىستارى باستالدى. وعان دەيىن اۆتوتۇراقتاردى باسقارعان كومپانيالار ءوز قىزمەتىن جالعاستىراتىن بولادى. ءقازىر اۆتوتۇراقتار شتاتتىق رەجيمدە جۇمىس ىستەپ تۇر. ادەتتەگىدەي، تولەمدەر تەكسەرىلىپ، ايىپپۇلدار سالىنادى.

«2022 -جىلدىڭ 6-جەلتوقسانىنداعى جاعداي بويىنشا كومپانيالاردىڭ ەسەپشوتىندا 596 ميلليون تەڭگە بار. بۇل سوما كۇن سايىن تولىقتىرىلىپ وتىرادى جانە سەرىكتەستىك باسشىلارىنا قاتىستى سوت ءىسى اياقتالعاننان كەيىن قۇرىلعان مەملەكەتتىك كاسىپورىننىڭ ەسەپشوتىنا اۋدارىلادى»، - دەپ اتاپ ءوتتى الماتى قالالىق موبيلدىلىك باسقارماسىنان.

ايتا كەتەيىك، كوكتەمدە الماتىداعى اقىلى اۆتوتۇراقتار قالانىڭ مەنشىگىنە قايتارىلعان بولاتىن.

ەسكە سالايىق، «Alan Parking» ج ش س ديرەكتورى مۇحتار بازاربايەۆ قاماۋعا الىنعان بولاتىن.

سونىمەن قاتار، «الماتى سپەتستەحپاركينگ سەرۆيس» ج ش س ديرەكتورى مارات پرينبەكوۆ تا قاماۋدا وتىر.

قازىرگى ۋاقىتتا كومپانيا باسشىلارىنا قاتىستى قىلمىستىق ءىس قوزعالدى جانە بيۋدجەت قاراجاتىن ۇرلاۋمەن بايلانىستى تەرگەۋ امالدارى ءجۇرىپ جاتىر.

الماتىدا اقىلى اۆتوتۇراق جۇيەسى العاش رەت 2016 -جىلى ەنگىزىلدى.