سوعىس كەزىندە حابارسىز كەتكەن جاۋىنگەرلەردىڭ سۇيەكتەرى ەلگە جەتكىزىلدى

قارۋلى كۇشتەردىڭ مەملەكەتتىك اسكەري-تاريحي مۋزەيىندە ماسكەۋدەن استاناعا قازاقستان قارۋلى كۇشتەرىنىڭ اسكەري بورتىمەن جەتكىزىلگەن سوعىس جىلدارىندا قازا تاپقان قازاقستاندىق جاۋىنگەرلەر ساپارباي يماحايەۆ پەن دادىكباي قۇلتاسوۆتىڭ سۇيەكتەرىن تابىستاۋدىڭ سالتاناتتى ءراسىمى ءوتتى. راسىمگە قورعانىس مينيسترلىگىنىڭ باسشىلىعى، قۇرمەت قاراۋىل روتاسى اسكەري قىزمەتشىلەرى، قوعام وكىلدەرى، قارۋلى كۇشتەر ارداگەرلەرى جانە قازا تاپقان جاۋىنگەرلەردىڭ تۋىستارى قاتىستى.

«ءبىز بۇگىن بولاشاق ۇرپاق ءۇشىن وزدەرىن قۇربان ەتكەن جاۋىنگەرلەرگە قۇرمەت كورسەتىپ وتىرمىز. قازىرگى وتان قورعاۋشىلار ءۇشىن ولار مىقتى رۋحتىڭ، كوزسىز باتىرلىق پەن انتقا شىن بەرىلگەندىكتىڭ ۇلگىسى سانالادى. ولاردىڭ ەرلىگى كەلەر ۇرپاقتىڭ جادىندا ماڭگى قالادى. ىزدەۋ جۇمىستارىنا بەلسەندى قاتىسىپ، جاستاردى اسكەري-پاتريوتتىق تاربيەلەۋگە زور ۇلەس قوسقاندارعا قارۋلى كۇشتەر باسشىلىعى اتىنان زور العىسىمدى بىلدىرەمىن»، - دەدى باس شتاب باستىعىنىڭ ورىنباسارى، گەنەرال-مايور اسان ءجۇسىپوۆ.

ساپارباي يماحايەۆتىڭ سۇيەگىن نوۆگورود وبلىسىنداعى «ناحودكا» جاساعىنىڭ ىزدەۋشىلەرى تاپتى. ول 1916-جىلى جامبىل وبلىسى جۋالى اۋدانى جاڭااۋىل اۋىلىندا دۇنيەگە كەلگەن. سايرام اۋداندىق اسكەري كوميسسارياتىنان سوعىسقا شاقىرىلدى، 1943 -جىلدىڭ قاڭتارىندا حابار-وشارسىز كەتتى.

قىزىلوردا وبلىسى تەرەكۇزەڭ اۋدانىنىڭ تۋماسى دادىكباي قۇلتاسوۆ 1904-جىلى تۋعان. ول لەنينگراد مايدانىندا 136-اتقىشتار ديۆيزياسىنىڭ قۇرامىندا سوعىسىپ، 1942-جىلدىڭ قىركۇيەك ايىنىڭ باسىنان بەرى حابار-وشارسىز كەتتى. ونىڭ سۇيەگىن لەنينگراد وبلىسىنداعى شايقاس ورنىنان «سۋۆوروۆ» جاساعىنىڭ ىزدەۋشىلەرى تاپتى.

«ءاربىر ىزدەۋشى ءۇشىن ەڭ باستىسى - قازا تاپقان ساربازدىڭ تۋىستارىن تابۋ. ءبىز ۇنەمى ەلىمىزدە تۇرعىندار، تۋىستار مەن جەرلەستەر اراسىندا جاقىن بايلانىس بار دەپ ايتامىز. بۇرىندارى ىزدەۋمەن اينالىساتىن وزگە ەلدەگى ارىپتەستەر بۇعان تاڭدانىسپەن قارايتىن. قازىر مۇنداي قارىم-قاتىناستىڭ مىقتى ەكەنىنە كوزدەرى ابدەن جەتتى»، - دەدى «Atamnyn Amanaty» ق ب باسقارما ءتوراعاسىنىڭ ورىنباسارى رايگۇل مۇشانوۆا.

ساربازداردىڭ سۇيەكتەرى جامبىل جانە قىزىلوردا وبلىستارىندا جاۋىنگەرلىك قۇرمەتپەن قايتا جەرلەنەدى.