گەرمانيا بيلىگى ەلدە توڭكەرىس جاساماق بولعاندار سانىنىڭ ءوسۋى مۇمكىن ەكەنىن ايتتى

«رەيحسبيۋرگەرلەر» مەملەكەتتىك بيلىكتى كۇشپەن باسىپ الماق بولعان، دەپ حابارلايدى قازاقپارات Euronews-كە سىلتەمە جاساپ.

تەرروريستىك توپ قاتىسۋشىلارى اراسىندا اسكەريلەر، ءتارتىپ ساقشىلارى مەن بۋندەستاگتىڭ ەكس- دەپۋتاتى بولعان. اۋقىمدى پوليتسيا وپەراتسياسى گەرمانيا، اۋستريا جانە يتاليادا ءوتتى.

«ايىپتىلار تىزىمىندەگى ادامدار سانى قازىرگى تاڭدا 54 ادامدى قۇرايدى. كەشە تاعى ەكەۋى ۇستالدى. وسى ىسكە قاتىسى بولۋى مۇمكىن تاعى باسقا دا ادامداردى انىقتادىق. ۇستالۋشىلار سانى تاعى دا ءوسۋى مۇمكىن»، - دەدى قىلمىستىق ىستەر جونىندەگى فەدەرالدىق ۆەدومستۆو باسشىسى حولگەر ميۋنح.

بيلىكتىڭ مالىمەتىنشە، وپەراتسياعا قۇقىق قورعاۋ ورگاندارىنىڭ 11 فەدەرالدىق جەرىندەگى 3000 استام قىزمەتكەرى تارتىلدى. ۇستالۋشىلار اراسىندا رەسەي ازاماتشاسى دا بار.

ەسكە سالايىق، بۇعان دەيىن گەرمانيا پوليتسياسى بيلىكتى كۇشپەن قۇلاتۋعا دايىندىق جۇرگىزگەن «ىشكى تەرروريستىك ۇيىمنىڭ» 25 كۇدىكتى مۇشەسى مەن جاقتاستارىن تۇتقىنداعان بولاتىن.

قۇقىق قورعاۋ ورگاندارىنىڭ مالىمەتىنشە، ولار بۇل توڭكەرىستى ءبىراز ۋاقىتتان بەرى جوسپارلاعان، تەك وڭتايلى ءساتتى كۇتىپ وتىرعان ەكەن.

فوتو: Paul Zinken/dpa

اۆتور

اقبوپە ءابدراسۋل