التاي كولگىنوۆ اكىم بولىپ تۇرعاندا ەلوردادا قانداي جۇمىستار اتقارىلدى

«قۇرمەتتى ەلوردا تۇرعىندارى!

سىزدەرمەن بىرگە استانامىزدىڭ يگىلىگى ءۇشىن قىزمەت ەتۋ مەن ءۇشىن ۇلكەن مارتەبە ءارى جاۋاپكەرشىلىك بولدى. ءۇش جارىم جىل بويى وزدەرىڭىزبەن بىرگە قالامىزدى دامىتىپ، تۇيتكىلدى ماسەلەلەردى شەشۋگە، سونداي-اق ەلوردانى ودان ءارى كوركەيتۋگە جانە ءومىر سۇرۋگە قولايلى ەتۋ جولىندا جۇمىس ىستەدىك.

استانا اكىمى قىزمەتىنە كىرىسكەن ساتتەن باستاپ كۇن سايىن قالا تۇرعىندارىمەن كەزدەسىپ ءجۇردىم. سول كەزدەگى باستى ماسەلەلەردىڭ ءبىرى ۇلەسكەرلەردىڭ ماسەلەلەرىن شەشۋ بولاتىن. ۇزاق ۋاقىتقا سوزىلعان ءاربىر قۇرىلىستىڭ ارتىندا پاتەرىن جىلدار بويى اسىعا كۇتكەن مىڭداعان ادامنىڭ تاعدىرى تۇرعانىن بىلەسىزدەر. وسى ۋاقىت ىشىندە ماسەلەسى قوردالانعان 16 مىڭعا جۋىق ۇلەسكەر وتباسىنىڭ سانىن 2 مىڭعا دەيىن ازايتتىق»، - دەپ جازدى التاي كولگىنوۆ.

ودان بولەك ەكس-اكىم تاعى ءبىر ماڭىزدى باعىت - شەت ايماقتارىمىزدى دامىتۋ جۇمىستارى تۋرالى ايتتى.

«ەلوردانىڭ ءاربىر ءتورتىنشى تۇرعىنى قالا شەتىندەگى ەلدى مەكەندەردە تۇرادى. مەملەكەت باسشىسىنىڭ تاپسىرماسىمەن ولاردى دامىتۋدىڭ جەكە جوسپارى قابىلداندى. شەتكەرى ەلدى مەكەندەردى دامىتۋ بويىنشا وسى ۋاقىت ىشىندە قىرۋار جۇمىس اتقارىلدى. 700 شاقىرىمعا جۋىق گاز قۇبىرى، 42 شاقىرىم سۋ قۇبىرى تارتىلىپ، 17 شاقىرىم جاڭبىر سۋىنا ارنالعان جەلى، 11 شاقىرىم كارىز جەلىسى جانە ت. ب. سالىندى. سونداي-اق ەلدى مەكەندەردە 250 كوشە، 300 اۋلا جانە قوعامدىق ورىندار جاسالدى»، - دەدى التاي كولگىنوۆ.

سونداي-اق، بۇرىنعى قالا باسشىسى ينفراقۇرىلىمدىق (گازبەن جۇمىس ىستەيتىن جىلۋ ستانسالارى، جاڭا اۋىز سۋ ستانساسى، نوسەرلى كارىز جەلىلەرى جانە ت. ب.)، الەۋمەتتىك نىسانداردىڭ دا قۇرىلىس كولەمى ايتارلىقتاي كوبەيگەنىن اتاپ ءوتتى.

«وسى ۋاقىت ىشىندە 93 مىڭ وقۋشىعا ارنالعان 45 مەكتەپ سالىندى. ونىڭ 36 سى جۇمىس ىستەپ تۇر، تاعى 9 ى بيىلعى وقۋ جىلىندا پايدالانۋعا بەرىلەدى. مەملەكەت باسشىسىنىڭ تاپسىرماسىمەن «جايلى مەكتەپ» ۇلتتىق جوباسى اياسىندا 100 مىڭ وقۋشىعا 25 ءىرى مەكتەپتى جوبالاۋ باستالدى. 20 مىڭنان استام الەۋمەتتىك پاتەردى قامتيتىن تۇرعىن ۇيلەر سالىندى.

ودان ءارى جۇيەلىلىك ءۇشىن قالانىڭ باس جوسپارىنا وزگەرىستەر ەنگىزىلىپ، پوليتسەنتريستىك اياسىندا 420 دان استام ۋچاسكە بەكىتىلدى. ولار: مەكتەپتەر قۇرىلىسىنا - 158 ۋچاسكە، بالاباقشالار - 185, ەمحانالار، پەرزەنتحانالار، وڭالتۋ ورتالىقتارى - تاعى 78 ۋچاسكە.

«استانا - جايلى قالا» باس جوسپارى اياسىندا ەلوردانى تۇرلەندىرۋ جولىندا اۋقىمدى جۇمىستار جۇرگىزىلدى. اتاپ ايتار بولسام، 900 دەن استام اۋلا مەن قوعامدىق ورىنداردى جاقسارتتىق. ول جەرلەردە تۇرعىندار مەن قالا قوناقتارى بوس ۋاقىتىن جايلى ءارى دەنساۋلىعىنا پايدالى ەتىپ وتكىزە الادى. كىشى تالدىكولدە ەكوپارك سالىنادى. ونىڭ جوبالىق-سمەتالىق قۇجاتتارى دايىن، قارجى دا ءبولىندى»، - دەدى ول.

ودان بولەك، بۇرىنعى قالا باسشىسى «ۇلى دالانىڭ» بويىنان جاڭا كوپىر اشىلعانىن، تاۋەلسىزدىكتىڭ بويىنان تاعى ءبىر كوپىر سالىنىپ جاتقانىن، 400 كوشە جوندەلگەنىن ەسكە سالدى.

«سونىمەن بىرگە، قالانىڭ ۇنەمى دامىپ وتىراتىن ءتىرى ورگانيزم ەكەنىن ەسكەرسەك، جىلۋمەن، سۋمەن، ەلەكترمەن جابدىقتاۋ جانە ت. ب. ينفراقۇرىلىمدىق نىسانداردى كەڭەيتۋ جانە جاڭادان سالۋ قالانىڭ تىنىس- تىرشىلىگىن قامتاماسىز ەتۋدە ءارقاشان ماڭىزدى ءرول اتقارادى. استانا تۇرعىندارىنىڭ سانى جىل سايىن ارتىپ كەلەدى، بۇل قالا باسشىلىعىنىڭ الدىنا جاڭا تالاپتار مەن جاڭا مىندەتتەر قويىپ وتىر.

ەلوردامىزدىڭ دامۋى مەملەكەت باسشىسىنىڭ ءاردايىم ەرەكشە باقىلاۋىندا. استانا تۇرعىندارىنىڭ سانى جىل سايىن ارتىپ كەلەدى. بۇل قالا باسشىلىعىنىڭ الدىنا جاڭا مىندەتتەر مەن تالاپتار قويىپ وتىر. شاھارىمىزدىڭ ءاربىر تۇرعىنى قالانىڭ دامۋىنا ءوز ۇلەسىن قوسىپ كەلەدى. بىرلەسكەن جەمىستى جۇمىس ءۇشىن بارشاڭىزعا جانە ارىپتەستەرگە العىس ايتامىن. جاڭا اكىمنىڭ جۇمىسىنا تابىس تىلەيمىن!» دەپ ءتۇيدى ءسوزىن التاي كولگىنوۆ.

اۆتور

ەربول جانات