مەكتەپكە «مينا قويعان» استانالىق وقۋشى ساباققا بارعىسى كەلمەگەن
«5-جەلتوقسان كۇنى الەۋمەتتىك جەلىلەردى مونيتورينگىلەۋ بارىسىندا تولە بي كوشەسىندەگى مەكتەپتەردىڭ بىرىندە تەرروريستىك اكتى بولاتىنى تۋرالى حابارلاما انىقتالدى. وقيعا ورنىنا پوليتسيا قىزمەتكەرلەرى كەلدى.
مەكتەپ عيماراتىن تەكسەرۋ بارىسىندا جارىلعىش قۇرىلعى تابىلمادى، ءىس-شارا ەۆاكۋاتسياسىز وتكىزىلدى، قاۋىپ سەيىلدى»، - دەلىنگەن پوليتسيا مالىمەتىندە.
استانا قالاسى پوليتسيا دەپارتامەنتى ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى جەدەل- ىزدەستىرۋ ءىس-شاراسىن وتكىزىپ. ناتيجەسىندە جالعان اقپارات تاراتۋشىنى انىقتادى. ول سول مەكتەپتىڭ 13 جاستاعى وقۋشىسى بولىپ شىقتى.
«جاس ءوسپىرىم ساباق بولماعانىن قالاپ، وسىلاي ازىلدەگەنىن ءتۇسىندىردى. يۋۆەنالدى پوليتسيا ينسپەكتورلارىنىڭ جانە بالانىڭ اتا-اناسىنىڭ قاتىسۋىمەن جاسوسپىرىممەن پروفيلاكتيكالىق اڭگىمە جۇرگىزىلدى. زاڭدى وكىلدەرىنە قاتىستى اكىمشىلىك سيپاتتاعى شارالار قابىلداناتىن بولادى»، - دەلىنگەن حابارلامادا.