جىلجىمايتىن مۇلىككە قارجى سالاتىن ۇلەسكەر نەنى ءبىلۋى كەرەك

بۇل تۋرالى قازاقپارات ءتىلشىسى اتىراۋ وبلىستىق مەملەكەتتىك ساۋلەت-قۇرىلىس باقىلاۋ باسقارماسىنا سىلتەمە جاساپ حابارلايدى.

ۇلەسكەر جىلجىمايتىن مۇلىككە اقشا سالۋ تۋرالى مامىلە جاساماس بۇرىن قۇرىلىس سالۋشىدان نىسانعا قاراجات تارتۋعا رۇقساتى بار-جوعىن ناقتىلاۋى كەرەك. رۇقسات بولعان جاعدايدا عانا الەۋەتتى سالىمشىنىڭ قارجىلىق سالىمدارى ساقتاندىرىلادى. «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭعا سايكەس ۇلەسكەرلەردىڭ قاراجاتىن ءتيىستى رۇقسات قۇجاتىنسىز قابىلداۋعا تىيىم سالىنادى. وسى ورايدا، قۇرىلىس سالۋشىلارعا ق ر اكىمشىلىك قۇقىق بۇزۋشىلىق تۋرالى كودەكسىنىڭ 320-بابىمەن، سونداي-اق، ق ر قىلمىستىق كودەكسىنىڭ 214-بابىنا سايكەس كاسىپكەرلىك قىزمەتتىڭ تىيىم سالىنعان تۇرلەرىمەن اينالىسقانى ءۇشىن جاۋاپكەرشىلىك كوزدەلگەنىن ەسكەرتەمىز. الدىن الا برونداۋ، رەزەرۆتەۋ جانە ينۆەستيتسيالاۋ، تالاپ ەتۋ قۇقىعىن بەرۋ شارتتارى سەكىلدى قولدانىستاعى زاڭنامادان تىس جاسالعان بارلىق ماملە جارامسىز بولىپ سانالادى، -

دەپ مالىمدەدى باسقارمانىڭ باسپا ءسوز قىزمەتى.

ايتا كەتسەك، وبلىستىق مەملەكەتتىك ساۋلەت-قۇرىلىس باقىلاۋ باسقارماسى قۇرىلىسى رۇقسات قۇجاتتارىنا ساي ءجۇرىپ جاتقان تۇرعىن ءۇي كەشەندەرىنىڭ ءتىزىمىن جاريالادى. اتىراۋ قالاسىندا قازىر 33 تۇرعىن ءۇي كەشەنى سالىنىپ جاتىر. باسقارما ۇسىنعان تىزىمگە قاراعاندا، 8 تۇرعىن ءۇي كەشەنىنىڭ قۇرىلىسىن جۇرگىزىپ جاتقان كومپانيالاردا ۇلەسكەرلەر قارجىسىن تارتۋعا رۇقسات بار. ال، 25 تۇرعىن ءۇي كەشەنىنىڭ قۇرىلىسىن جۇرگىزۋشىلەرگە مۇنداي رۇقسات بەرىلمەگەن.

ەسكە سالا كەتەلىك، بۇدان بۇرىن اتىراۋدا رۇقساتسىز سالىنعان 4 قاباتتى تۇرعىن ءۇي بۇزىلاتىنىن جازعان بولاتىنبىز.