رەسەي تەلەارنالارىن سوت ۇكىمىمەن عانا شەكتەي الامىز - دارحان قىدىرالى
بۇگىن ماجىلىستە وتكەن باسپا ءسوز ءماسليحاتىندا تىلشىلەر مينيستردەن قازاقستاننىڭ اقپاراتتىق قاۋىپسىزدىگىن قورعاۋ جانە رەسەي تەلەارنالارىنا شەكتەۋ قويۋ جايىندا سۇرادى.
«ارينە، اقپاراتتىق قاۋىپسىزدىك ءبىزدىڭ باسىم باعىتتارىمىزدىڭ ءبىرى. ءبىراق ءبىز سوتتىڭ ۇكىمىمەن عانا شەكتەي الامىز. وسىعان بايلانىستى ازاماتتارىمىزدىڭ شاعىمى مەن سوت ۇكىمى بولسا، ءبىز ونى ورىندايمىز. زاڭ بۇزۋ دەرەكتەرى تىركەلسە، وسى ورايدا سوتتىڭ شەشىمى بولسا، وندا بۇل شەشىم ورىندالادى. قازىر جالپى مونيتورينگ جۇرگىزىپ وتىرمىز. بۇعان قاتىستى كوپتەگەن ماسەلە سىرتقى ىستەر مينيسترلىگىنىڭ قۇزىرەتىندە»، - دەدى د. قىدىرالى.
ۆەدومستۆو باسشىسى قازاقستان ازاماتتارىنىڭ دۇرىس اقپارات الۋىنا ەرەكشە نازار اۋدارىلىپ وتىرعانىن ايتتى.
«سوندىقتان بۇل ماسەلەنى پىسىقتاپ جاتىرمىز. جاڭا ايتتىم، بۇل ماسەلە سىرتقى ىستەر مينيسترلىگى مەن سوتتىڭ قۇزىرەتىندە. ءبىزدىڭ مينيسترلىك ءوز بەتىنشە ونداي شەكتەۋمەن اينالىسپايدى. جالپى، ازاماتتاردىڭ پىكىرىن ءبىز قازىر كورىپ وتىرمىز، مونيتورينگ جۇرگىزىلىپ جاتىر. اتاپ ايتقاندا، بۇل ماسەلەسى بويىنشا سوتتىڭ شەشىمى بولسا، قاراستىرامىز»، - دەدى مينيستر.
