كومىرگە باي ەكىباستۇزدىڭ جىلۋسىز قالۋى تاريفتىك ساياساتپەن بايلانىستى - سەرىك جۇمانعارين

استانا. قازاقپارات - پرەمەر- ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين كومىرگە باي ەكىباستۇز حالقىنىڭ نەگە جىلۋسىز وتىرعانىن ءتۇسىندىردى، دەپ حابارلايدى قازاقپارات ءتىلشىسى.

«مەنىڭ ويىمشا، بۇل الەۋمەتتىك باعىتتاعى تاريفتىك ساياساتتىڭ باسىم بولۋىنا بايلانىستى. جۇكتەمە نەگىزىنەن بيۋدجەتتىك ۇيىمدار مەن زاڭدى تۇلعالارعا جۇكتەلدى. ءتاريفتى سارالاۋ وسىلاي جۇرگىزىلدى، سوندىقتان وتكەن جىلى تاريف ەسەبىنەن ەكىباستۇزدا 420 ك م جەلىنىڭ 619 مەترىن عانا جوندەۋگە مۇمكىندىك تۋدى. بۇل %0,01 كورسەتكىش عانا. ەرتەلى- كەش مۇنداي تاريفتىك ساياساتتىڭ سالدارى بايقالادى. ويتكەنى مۇنداي نىسانداردى ۇستاۋ قىمبات»، - دەدى سەرىك جۇمانعارين.

سپيكەر ەل باسشىلىعىنىڭ اپاتقا دەيىن دە بۇل ماسەلەگە نازار اۋدارعانىن جەتكىزدى. تاريفتىك ساياساتقا جاڭا تاسىلدەردى ازىرلەۋ جۇمىستارى اياقتالىپ قالدى.

ونىڭ ايتۋىنشا، ەكىباستۇزداعى جىلۋ جەلىلەرىنىڭ ۇزىندىعى 420 ك م جەتەدى، ونىڭ 322 شاقىرىمى «ورتالىق ازيا ەنەرگەتيكالىق كورپوراتسياسى» ا ق (و ا ە ك) تيەسىلى. اپات و ا ە ك جەلىلەرىندە بولعان.

بۇگىنگى كۇنى ەكىباستۇزدىڭ 6, 5ا جانە 5ب شاعىناۋداندارىندا جىلۋ بەرۋدى قالپىنا كەلتىرۋ جۇمىستارى جالعاسىپ جاتىر.

اپاتتى جويۋ جونىندەگى شتاب باسشىسى – ق ر پرەمەر- ءمينيسترىنىڭ ءبىرىنشى ورىنباسارى رومان سكلياردىڭ حابارلاۋىنشا، 6-جەلتوقسان كۇنى ساعات 08.00 دەگى جاعداي بويىنشا كىرەبەرىستەردى جىلۋعا قوسۋ جۇمىستارى 4 ۇيدە جۇرگىزىلۋدە. بۇل جۇمىستاردى بۇگىن اياقتاۋ جوسپارلانعان. زارداپ شەككەن نىساندارعا بەكىتىلگەن كاسىپورىندار تاۋلىك بويى ينجەنەرلىك كوممۋنيكاتسيالاردى قالپىنا كەلتىرۋ جۇمىستارىمەن اينالىسىپ جاتىر.