كەدەيلىكتى جويۋ مۇمكىن ەمەس، ءبىراق الدىن الۋعا بولادى - تامارا دۇيسەنوۆا

«كەدەيلىك بارلىق ەلدە بار. ابسوليۋتتى كەدەيلىك جانە سالىستىرمالى كەدەيلىك بار. قازاقستاندا سالىستىرمالى كەدەيلىك دەپ ايتار ەدىم. جالاقى ءوسىپ جاتىر، الەۋمەتتىك تولەمدەر، قاجەتتىلىكتەر مەن باعالار دا وسۋدە. بۇل ءار ۋاقىتتا وسى مولشەردەن تومەن ادامداردى ءبولىپ كورسەتەدى. كەدەيلەر مۇلدەم بولمايدى دەپ ايتۋ مۇمكىن ەمەس. ءبىراق ادامدارعا دەر كەزىندە قولداۋ كورسەتۋگە جانە وسى كەدەيلىكتىڭ الدىن الۋعا بولادى. سول ءۇشىن ءبىز سيفرلىق كارتانى جاساپ شىعاردىق»، - دەدى تامارا دۇيسەنوۆا ماجىلىستەگى ۇكىمەت ساعاتىنان كەيىن تىلشىلەرگە بەرگەن سۇحباتىندا.

ءمينيستردىڭ ايتۋىنشا، قازىر كەدەيلىكتىڭ سالدارىمەن كۇرەس ءجيى بايقالادى. مىسالى، اسىراۋشىسى جۇمىسىنان ايىرىلعان وتباسىنا جۇمىس تابۋعا نەمەسە ۋاقىتىلى الەۋمەتتىك تولەم بەرۋگە بولادى.

«مەن ءبىر وڭىرگە ساپارلاپ باردىم. وندا ءبىر كوپبالالى وتباسى اي سايىن جاردەماقى تۇرىندە شامامەن 110 مىڭ تەڭگە الۋى كەرەك ەدى. ولار مۇنى بىلمەگەن جانە 25 مىڭ تەڭگە اتاۋلى الەۋمەتتىك كومەك الىپ كەلگەن. مۇنى ءبىز ۋاقىتىلى حاباردار ەتسەك، بۇل وتباسىنىڭ جاعدايى اناعۇرلىم جاقسى بولار ەدى.

قازىر كوپ جۇمىس جاعدايدىڭ الدىن الۋعا باعىتتالادى. بىزدە قازاقستاندا 200 دەن استام زاڭ بار، ادامدار وزدەرىنىڭ قۇقىقتارى تۋرالى اقپارات الۋى كەرەك، نە نارسەگە قۇقى بارىن ءبىلۋى قاجەت. ودان كەيىن ءوز تاڭداۋلارىن جاساي الادى»، - دەيدى ەڭبەك ءمينيسترى.

بۇعان دەيىن مينيستر بيۋدجەتتىك ۇيىمداردىڭ بارلىق جالاقىسى وسەتىنىن ايتقان ەدى.