استانالىقتار دارىگەرلەردىڭ دورەكى سويلەۋىنە جيى شاعىمدانادى

بۇگىن باس شاھاردا ب ا ق وكىلدەرىنىڭ قاتىسۋىمەن وتكەن بريفينگىدە «الەۋمەتتىك مەديتسينالىق ساقتاندىرۋ قورى» ك ە ا ق استانا قالالىق فيليالىنىڭ ديرەكتورى نۇرلىبەك قابدىقاپاروۆ وسىلاي دەدى، دەپ حابارلايدى قازاقپارات ءتىلشىسى.

«مەديتسينالىق ساقتاندىرۋ قورىنىڭ نەگىزگى باسىمدىقتارىنىڭ ءبىرى - پاتسيەنت قۇقىعىن قورعاۋ. وسىعان وراي كەرى بايلانىس قۇرالدارى ارقىلى تۇسەتىن شاعىمدار مەن وتىنىشتەر ەرەكشە باقىلاۋدا بولادى. جىل باسىنان «الەۋمەتتىك مەديتسينالىق ساقتاندىرۋ قورى» استانا قالاسى بويىنشا فيليالىنىڭ قىزمەتكەرلەرى 6237 ءوتىنىش قابىلدادى. ونىڭ ىشىندە 3302 - شاعىم، 417 - العىس، 206 - شاعىن جانە ورتا بيزنەس ءۇشىن ساقتاندىرۋ مارتەبەسىن تۇزەتۋ، 2312 - جەڭىلدىك ساناتى بويىنشا ۋاقىتشا مارتەبە بەرۋ وتىنىشتەرى.

شاعىمداردىڭ نەگىزگى بولىگى «1406» بايلانىس ورتالىعى مەن «Qoldau 24/7» موبيلدىك قوسىمشاسى ارقىلى تۇسەدى. تۇسكەن بارلىق شاعىمدار بويىنشا شارا قابىلدانىپ، ءوتىنىش يەلەرىنە جاۋاپ بەرىلدى. تۇرعىندار كوبىنە ەمحانالارداعى مەديتسينالىق قىزمەت ساپاسىنا، كونسۋلتاتيۆتىك- دياگنوستيكالىق قىزمەتتەردىڭ قولجەتىمسىزدىگىنە، كەزەكتىڭ ۇزاقتىعىنا جانە مەديتسينا قىزمەتكەرلەرىنىڭ دورەكى سويلەۋىنە شاعىمدانادى» - دەدى نۇرلىبەك قابدىقاپاروۆ.

سونىمەن بىرگە ول جىل باسىنان حالىققا كورسەتىلگەن مەديتسينا قىزمەتتەرىنىڭ ساپاسىنا جۇرگىزىلگەن مونيتورينگ ناتيجەسىندە 366029 كەمشىلىك انىقتالىپ، 1 ميلليارد 737 ميلليون تەڭگە وندىرىلگەنىن ءمالىم ەتتى.