ىشكى ىستەر ءمينيسترى جارىلعىش زات تۋرالى جالعان حابارلامالاردى تەكسەرۋدىڭ قيىندىعىنا توقتالدى

جۋرناليستەرمەن كەزدەسۋ كەزىندە مەكتەپتەرگە بومبا قويىلعانى تۋرالى جالعان اقپاراتتىڭ تارالۋى، كۇرەس جولى تۋرالى ايتىپ بەردى، دەپ حابارلايدى قازاقپارات ءتىلشىسى.

سوڭعى جىلدارى اقتوبە قالاسىنداعى مەكتەپتەرگە بومبا قويىلدى دەگەن اقپارات كوپ تاراپ، ارنايى قىزمەت تەكسەرۋ جۇرگىزۋدى جيىلەتتى. ءتىپتى العاشقى قوڭىراۋ كۇنى دە دۇرلىككەن كەزدەر بولدى. سونىمەن بىرگە ءبىر ساتتە بىرنەشە ءبىلىم ورداسى قاتار نازارعا ىلىكتى.

اقتوبەگە كەلگەن ءى ءى م مارات احمەتجانوۆ باسپا ءسوز ءماسليحاتىندا وسىعان قاتىستى سۇراققا جاۋاپ بەردى.

«بۇل - قىلمىستىق ءىس. وقۋ، وندىرىستىك پروتسەستە ىركىلىس بولىپ، ماتەريالدىق شىعىن اكەلەدى. ءار حابارلاما مۇقيات تەكسەرىلەدى. بۇل - تالاپ. ساۋدا ورتالىقتارى بولسا، ءبىلىم وشاعىندا دا ادامدار ەۆاكۋاتسيالانادى. وكىنىشكە قاراي نومىرلەرى، ەلەكتروندى مەكەنجايلارى انىقتالماي جاتادى. كەيدە وزگە ەلدەن جىبەرىلەدى. كەيبىرى بۇزاقىلىق جاسايدى، مەكتەپكە بارعىسى كەلمەگەندەر حابارلايدى، كەيدە ادامدار اراسىندا ۇرەي تۋدىرۋ ءۇشىن ادەيى جالعان حابارلاما بەرەتىندەر بار. قازىر مەكتەپتەردىڭ قاۋىپسىزدىگى ماڭىزدى. ءبىلىم وشاقتارىنىڭ كوبىندە بەينەباقىلاۋ كامەراسى بار، دابىل جۇيەسى قوندىرىلعان. ەلەكتروندى تۋرنيكەت ورناتىلعان. IT ماماندار دا جۇمىس ىستەپ جاتىر. ولاردىڭ بۇل باعىتتاعى جۇمىسى جاقسى ناتيجە بەرەدى دەپ ۇمىتتەنەمىز»، - دەدى ءى ءى م مارات احمەتجانوۆ.