رۋسلان جەلدىباي پرەزيدەنتتىڭ فرانسياعا ساپارى تۋرالى: ميلليونداعان دوللارلىق ينۆەستيتسيا مەن وزىق تەحنولوگيالاردى تارتۋعا كەلىسىم-شارتتار جاسالدى

«مەملەكەت باسشىسى فرانسيانىڭ جەتەكشى كومپانيالارىنىڭ باسشىلارىمەن ءبىرقاتار كەزدەسۋ وتكىزدى. كەزدەسۋدە ساۋدا، ينۆەستيتسيا، ونەركاسىپ، كولىك-لوگيستيكا جانە ەنەرگەتيكا سالالارىنداعى ماسەلەلەر جان-جاقتى تالقىلاندى.

مۇناي-گاز سالاسىندا ءىرى كاسىپورىن سانالاتىن Total Energies كومپانياسى ەلىمىزگە 12 ميلليارد دوللار ينۆەستيتسيا قۇيعان. ديرەكتورلار كەڭەسىنىڭ ءتوراعاسى پاتريك پۋياننە پرەزيدەنتكە ونىڭ كومپانياسى قازاقستاندا تاعى بىرنەشە اۋقىمدى جوبانى جۇزەگە اسىرۋعا نيەتتى ەكەنىن جەتكىزدى. اتاپ ايتقاندا، قۋاتى 1 گ ۆ ت- تىق جەل ەلەكتر ستانتسياسىنىڭ قۇرىلىسى ءسوز بولدى. نىسان 2026-2027-جىلدارى قازاقستاننىڭ وڭتۇستىك-شىعىسىندا پايدالانۋعا بەرىلەدى. جوبانىڭ بولجامدى قۇنى - 1,9 ميلليارد دوللار.

Air Liquide حيميا كومپانياسىنىڭ پرەزيدەنتى فرانسۋا جاكوۆ مەملەكەت باسشىسىنا ونىڭ كومپانياسى قازاقستاندا جالپى ينۆەستيتسيا كولەمى 120 ميلليون ەۋرو بولاتىن جوبالاردى ىسكە اسىرعانى تۋرالى ايتىپ بەردى. كومپانيانىڭ قاتىسۋىمەن قۇرىلعان بىرلەسكەن كاسىپورىن اتىراۋ مەن پاۆلودارداعى مۇناي وڭدەۋ زاۋىتتارىنىڭ نەگىزىندە تەحنيكالىق گاز ءوندىرىسىن جولعا قويدى.

Orano S. A. كومپانياسى ديرەكتورلار كەڭەسىنىڭ ءتوراعاسى كلود يموۆەن KATCO بىرلەسكەن كاسىپورنى قازاقستاندا جىلدىق ۋران ءوندىرىسىنىڭ %15 جانە الەمدىك ءوندىرىستىڭ %7 وندىرەتىنىن جەتكىزدى. Orano S. A. - فرانسيا اتوم ونەركاسىبى سالاسىنىڭ كوشباسشىسى.

اتوم ەنەرگەتيكاسى ماسەلەسى ةlectricité de France (EDF) باس ديرەكتورى ليۋك رەمونمەن بولعان كەزدەسۋ بارىسىندا دا قوزعالدى. پرەزيدەنت ليۋك رەمونمەن اتوم ەنەرگەتيكاسىنا وزىق تەحنولوگيالاردى ەنگىزۋ پەرسپەكتيۆالارىن قاراستىردى. اتالعان ماسەلە ەلىمىزدە اەس سالۋ جوسپارى تۇرعىسىنان وزەكتى. سونداي-اق جاڭارتىلاتىن ەنەرگيا كوزدەرى سالاسىنداعى جوبالاردى ىسكە اسىرۋ مۇمكىندىكتەرى تالقىلاندى.

Alstom كومپانياسى ديرەكتورلار كەڭەسىنىڭ ءتوراعاسى انري پۋپار-لافارج مەملەكەت باسشىسىنا كومپانيا جاقىن ارادا ەلەكتروۆوزدار مەن تەمىرجول كولىگى جابدىقتارىن ءوندىرۋ، قىزمەت كورسەتۋ جونىندەگى جوبالارعا 50 ميلليون ەۋرو ينۆەستيتسيا قۇياتىنىن ايتتى. ەنەرگەتيكالىق جابدىقتار مەن تەمىرجول كولىگى وندىرىسىندە الەمدىك كوشباسشىلاردىڭ ءبىرى سانالاتىن Alstom كومپانياسىنىڭ سەرۆيستىك ورتالىقتارى استانا، الماتى قالالارىندا، جامبىل جانە تۇركىستان وبلىستارىندا اشىلادى. بۇل جوبالاردى ىسكە اسىرۋعا مىڭنان استام قازاقستاندىق مامان جۇمىلدىرىلادى»، - دەدى رۋسلان جەلدىباي.

سونىمەن قاتار ول مەملەكەت باسشىسى Airbus, Saint-Gobain, Boehringer Ingelheim France, Soufflet Group, Total Energies, BPI France, Vicat, Syctom, Pellenc, Total Eren, PCM، Safran, Thales, Groupe EDF، Assystem, Evolution International, MHB SAS، Exa International, Rungis Semmaris, MBDA، SOPREMA جانە باسقا دا فرانسيانىڭ ءىرى كومپانيالارىنىڭ باسشىلارىمەن كەزدەسكەنىن جانە بۇل شارا پرەزيدەنتتىڭ پاريجگە جاساعان ساپارى اياسىنداعى ماڭىزدى وقيعانىڭ ءبىرى بولعانىن جەتكىزدى.

«پرەزيدەنت ءوز سوزىندە ينۆەستيتسيالىق ىنتىماقتاستىقتىڭ كەلەشەگى مول باعىتتارىن ۇسىندى. اتاپ ايتقاندا، اگروونەركاسىپ كەشەنى، ەنەرگەتيكا، ەكونوميكانىڭ ناقتى سەكتورى، كولىك جانە لوگيستيكا، سيفرلاندىرۋ سالالارىنداعى جوبالار تۋرالى ءسوز بولدى.

مەملەكەت باسشىسىنىڭ فرانسياعا ساپارى اياسىندا ەكونوميكامىزعا زور پايدا اكەلەتىن وتىزعا جۋىق كەلىسىمگە قول قويىلدى.

وسىلايشا، پرەزيدەنتتىڭ پاريجدەگى ءاربىر كەزدەسۋىندە ناقتى جوبالاردى ىسكە اسىرۋعا، ميلليونداعان دوللارلىق ينۆەستيتسيا مەن وزىق تەحنولوگيالاردى تارتۋعا جانە جاڭا جۇمىس ورىندارىن اشۋعا مۇمكىندىك بەرەتىن كەلىسىم- شارتتار جاسالدى»، - دەپ تولىقتىردى ر. جەلدىباي.