سەرىك جۇمانعارين ماماندارعا العىس ايتتى: ەكىباستۇز - ەڭبەك ادامدارىنىڭ قالاسى

العاشقى ەكى كۇن وتە قيىن بولدى. ويتكەنى، قاي جەردەن سۋ اققانىن ماماندار بىلگەن جوق. مۇنى تاپپاسا، جاعداي ءتىپتى كۇردەلى بولار ەدى. ەندى قازىرگى جاعداي تولىق وزگەردى، اقاۋ ورىندارى تابىلدى، بۇگىن جۇمىستىڭ 99 پايىزى بىتەدى. ەكىباستۇز - ەڭبەك ادامدارىنىڭ، جۇمىسكەرلەردىڭ قالاسى. تۇرعىنداردىڭ وزدەرى بوس وتىرماي، جىلۋ جۇيەسىن جوندەپ، سۋىن توگىپ، جىلىتۋعا تىرىسىپ جاتىر. بىرەۋى ىزالانىپ، نارازىلىعىن ءبىلدىرىپ، جامان ءسوز ايتقان جوق. تاڭعى 8 دە شتاب جۇمىسىن باستاپ، دەنساۋلىق باعىتىنداعى عيماراتتاردى ارالادىق، ءبىز بارعاندا پەرزەنتحانادا دۇنيەگە ءسابي كەلدى. بۇل - جاقسى ىرىم. ءومىر جالعاسىپ جاتىر. باۋى بەرىك بولسىن!

- دەدى سەرىك جۇمانعارين ەكىباستۇزدا وتكەن باسپا ءسوز كونفەرەنتسياسىندا.

پرەمەر-مينيستر ورىنباسارى اپات كەزىندە جۇمىس ىستەگەن ماماندارعا العىسىن ايتتى.

وبلىس اكىمى ءبىرىنشى كۇننەن بەرى وسىندا ءجۇر، قاراپايىم ادامدار وتە كاسىبي جۇمىس ىستەدى. ولاردىڭ جاساعان ءاربىر قادامى دۇرىس بولدى، سول ءۇشىن بارىنە راحمەت ايتقىم كەلەدى،

- دەدى س. جۇمانعارين.

بۇعان دەيىن سەرىك جۇمانعارين كەشكە دەيىن بارلىق كوپقاباتتى ۇيلەرگە جىلۋ بەرىلەتىنىن ايتقان ەدى.

ەستەرىڭىزگە سالا كەتسەك، 27- قاراشا كۇنى ساعات 1:20 شاماسىندا ەكىباستۇز ج ە و- دا قازاندىق ىستەن شىعىپ، ون مينۋتتان كەيىن تاعى ۇشەۋى توقتاعان بولاتىن.

وسىدان كەيىن قالاداعى بالالاردى قولداۋ ورتالىعىنىڭ تاربيەلەنۋشىلەرى پاۆلودارعا اۋىستىرىلىپ، مەكتەپ وقۋشىلارى ونلاين ءبىلىم الۋعا كوشىرىلدى.

ۇكىمەت وتىرىسىندا وبلىس اكىمى ءابىلقايىر ىسقاقوۆ قالاداعى احۋالعا قاتىستى ەسەپ بەردى.

پرەمەر-مينيستر ءاليحان سمايىلوۆ ەكىباستۇز قالاسىنداعى جاعدايدى قالپىنا كەلتىرۋ بويىنشا ءبىرقاتار تاپسىرما بەردى.

ۇكىمەت باسشىسىنىڭ تاپسىرماسى بويىنشا پرەمەر-ءمينيستردىڭ ورىنباسارى سەرىك جۇمانعارين مەن توتەنشە جاعدايلار ءمينيسترى يۋري يلين ەكىباستۇزعا باردى. بۇگىن ساعات 8:00 دە وتكەن ەكىباستۇزداعى توتەنشە جاعدايدى جويۋ جونىندەگى جەدەل شتابتىڭ وتىرىسىندا قالانىڭ جىلۋ جەلىلەرىندەگى قازىرگى جاعداي مەن تەمپەراتۋرالىق رەجيمدى قالپىنا كەلتىرۋ بويىنشا قابىلدانىپ جاتقان شارالار تالقىلاندى.