الماتىداعى اسكەري بولىمگە باۋىرجان مومىش ۇلىنىڭ ەسىمى بەرىلدى
بۇل تۋرالى قازاقپارات ءتىلشىسى ۇلتتىق ۇلاننىڭ باسپا ءسوز قىزمەتىنە سىلتەمە جاساپ حابارلايدى.
ۆەدومستۆو مالىمەتىنە ساي، ۇكىمەتتىڭ 2022 -جىلعى 22-قاراشاداعى №937-قاۋلىسىمەن ۇلتتىق ۇلاننىڭ 5571 اسكەري بولىمىنە كەڭەس وداعىنىڭ باتىرى، حالىق قاھارمانى باۋىرجان مومىش ۇلىنىڭ ەسىمى بەرىلگەن.
«قازاق ارمياسىنىڭ تاريحىندا باتىر باۋىرجان مومىش ۇلىنىڭ ءرولى ەرەكشە. ءوزىنىڭ ءور مىنەزىمەن، قولباسشىلىق ونەرىمەن، اسقان پاراساتتىلىعىمەن جانە ۇلتجاندىلىعىمەن اتى اڭىزعا اينالعان تۇلعا. ونىڭ تالانتتى باسشىلىعىمەن ساربازدار مەن وفيتسەرلەر قاندى شايقاستاردا جاۋعا ەرجۇرەكتىلىكپەن توتەپ بەردى جانە ەكىنشى دۇنيەجۇزىلىك سوعىس مايدانىندا شايقاسقاندا ۇلكەن جەڭىس اكەلدى. بۇگىندە مىنە، جەدەل قۇرامامىز اڭىز قولباسشىنىڭ ەسىمىن يەمدەنىپ جاتىر. بۇل ءبىز ءۇشىن ۇلكەن ماقتانىش»، - دەدى 5571 اسكەري ءبولىمىنىڭ كومانديرى باقداۋلەت وسپانبەكوۆ.
