كەي ادامدارعا قۇمار ويىن ويناپ، ءباس تىگۋگە تىيىم سالاتىن بۇيرىقتىڭ جوباسى جاريالاندى
بۇيرىقتىڭ جوباسى اشىق ن ق ا سايتىندا جاريالاندى، دەپ حابارلايدى قازاقپارات ءتىلشىسى.
جاڭا قۇجات تالابىنا سايكەس كەيبىر تۇلعالارعا قۇمار ويىندار مەن ءباس تىگۋگە تىيىم سالىنادى.
ولار - قۇمار ويىندار مەن ءباس تىگۋگە ازارتقا بەرىلگەن جەكە تۇلعالار، سونداي-اق ءوزىن قۇمار ويىندار نەمەسە ءباس تىگۋگە قاتىسۋدان شەكتەگەن جەكە تۇلعالار.
سونداي-اق، ەرەجەدە ستاۆكالاردى ەسەپكە الۋ ورتالىعىن قۇرۋ كوزدەلگەن.
ۇسىنىلعان قاعيدالارعا سايكەس بۋكمەكەرلىك كەڭسەلەر مەن توتاليزاتورلار ءار ويىنشىنىڭ ءباس تىگۋ ستاۆكالارى (ونىڭ ىشىندە ەلەكتروندى)، ءباس تىگۋ ناتيجەسىنىڭ نۇسقالارىنا كوەففيتسيەنتتەر، ولار بويىنشا ۇتىستار مەن تولەمدەر تۋرالى مالىمەتتى ونلاين بەرەدى.
ونىڭ ىشىندە ءباس تىگۋگە قاتىسۋشىلاردىڭ اتى-ءجونى، ج س ن، ستاۆكانىڭ قابىلدانعان كۇنى مەن سوماسى، ۇتىستىڭ سوماسى مەن كۇنى، ۇتىستىڭ سوماسى مەن تولەنگەن كۇنى، ۇتىستىڭ اقشالاي بالاماسى، فيسكالدىق دەرەكتەر بار.
«ستاۆكانى ەسەپكە الۋ ورتالىعى قۇمار ويىندار مەن ءباس تىگۋگە قاتىسۋعا شەكتەۋ قويىلعان تۇلعالاردان قولما-قول جانە ەلەكتروندى تولەمدەردى قابىلداۋدان باس تارتىپ، ول تۋرالى حابارلايدى»، - دەلىنگەن جاريالانعان جوبالىق قۇجاتتا.
دەرەكتەردى ەسەپكە الۋدى ۋاكىلەتتى ورگان جۇزەگە اسىرادى.
اقپارات جابىق حاتتامانى قولدانا وتىرىپ، سالىقتار مەن بيۋجەتكە تولەنەتىن تولەمدەردىڭ ءتۇسۋىن قامتاماسىز ەتۋ سالاسىنداعى باسشىلىقتى جۇزەگە اسىراتىن مەملەكەتتىك ورگانعا جانە قارجى مونيتورينگى جونىندەگى ۋاكىلەتتى ورگانعا ونلاين جىبەرىلەدى.
كەيىن بۋكمەكەرلىك كەڭسەلەر مەن توتاليزاتورلاردىڭ قىزمەتى تۋرالى ستاتيستيكالىق جانە تالدامالىق اقپارات جاساقتالادى.
اتالعان قۇجات بيىل 8- جەلتوقسانعا دەيىن قوعامدىق تالقىلاۋعا سالىنادى.
