بايان ولگي ايماعىنىڭ قازاعى سۇلتان تاۋكەي ۇلى موڭعوليانىڭ حالىق جازۋشىسى اتاندى

رەسپۋبليكا قۇرىلعانىنا 98 جىل، ۇلى يمپەراتور شىڭعىس حاننىڭ تۋعانىنا 860 جىل تولۋىنا وراي موڭعوليا پرەزيدەنتى ۋحنااگين ءحۇرەلسۇح جارلىق شىعارىپ ءبىرقاتار ازاماتتارعا مەملەكەتتىك جوعارعى اتاق، وردەن، مەدالدەر تابىستالدى.

وسى ورايدا موڭعوليا مادەنيەتىنە ەڭبەك سىڭىرگەن قايراتكەر سۇلتان تاۋكەي ۇلىنا «حالىق جازۋشىسى» اتاعى بەرىلدى.

ول «موڭعولدىڭ قۇپيا شەجىرەسى»، «ەجەلگى موڭعول پاتشالارىنىڭ ۇلتتىق ەنتسيكلوپەدياسى» سياقتى تاريحي دەرەككوزدەر، «موڭعول حالىق ماقال- ماتەلدەرى»، «موڭعوليا كونستيتۋتسياسى» قاتارلى تۋىندىلاردى قازاق تىلىنە اۋدارىپ، قازاق وقىرماندارىنا ۇسىنعان.

سونىمەن قاتار، «قۇران كاريم»، «يسلام تۋرالى نەگىزگى مالىمەتتەر»، اباي قۇنانبايەۆتىڭ «قارا سوزدەرى» قاتارلى تۋىندىلاردى موڭعول تىلىنە اۋدارىپ، حالىق اعارتۋ ىسىنە زور ۇلەس قوسقان.

سۇلتان تاۋكەي ۇلى 1944 -جىلى 17 -قاراشادا مونعوليانىڭ بايان- ولگي ايماعىندا تۋعان.

1966 -جىلى موڭعوليا ۋنيۆەرسيتەتىن بىتىرگەن. ەكونوميكا عىلىمىنىڭ كانديداتى. مەملەكەت، قوعام قايراتكەرى. موڭعوليا حالىق رەسپۋبليكاسىندا ساۋدا مينيسترلىگى دەپارتامەنتىنىڭ باستىعى، اۋداندىق، قالالىق، ايماقتىق پارتيا كوميتەتتەرىنىڭ ەكىنشى جانە ءبىرىنشى حاتشىسى بولعان.

موڭعوليا رەسپۋبليكاسىنىڭ پارلامەنت مۇشەسى بولىپ سايلانعان. مونعوليانىڭ ۆەنگريا، اۆستريا ەلدەرىندەگى توتەنشە جانە وكىلەتتى ەلشىسى قىزمەتىن اتقارعان.

سۇلتان تاۋكەي ۇلى مەملەكەتتىك جاۋاپتى قىزمەتتەردە ءجۇرىپ، 1964 -جىلدان باستاپ ادەبيەتپەن شۇعىلدانىپ، پروزا، دراما، اۋدارما جانرلارىندا جەمىستى ەڭبەك ەتىپ كەلەدى. وننان اسا كىتاپتىڭ اۆتورى.

شىعارمالارىن ەكى تىلدە - قازاق جانە مونعول تىلدەرىندە جازادى.

فوتو: kaznews.mn