كرەديتتەر كەشىرىلگەنى تۋرالى تاراپ جاتقان اقپارات راس پا

استانا. قازاقپارات - قارجى نارىعىن رەتتەۋ جانە دامىتۋ اگەنتتىگى «كرەديتتەرگە امنيستيا» جاسالعانى تۋرالى الەۋمەتتىك جەلىلەردەگى حابارلامالارعا تۇسىنىك بەردى، دەپ حابارلايدى قازاقپارات.

ءمالىم ەتىلگەندەي، الەۋمەتتىك جەلىلەردە جانە مەسسەندجەرلەردە «كرەديتتىك راقىمشىلىق» جاسالدى جانە قارىزداردىڭ بارلىق تۇرلەرى ەسەپتەن شىعارىلدى» دەگەن سىندى اقپاراتتار اۋىق-تاۋىق شىعىپ تۇرادى.

قارجى نارىعىن رەتتەۋ جانە دامىتۋ اگەنتتىگى بۇل اقپاراتتار شىندىققا جاناسپايتىنىن مالىمدەيدى.

بۇل رەتتە اگەنتتىك بىلتىر نەسيەسى بويىنشا قارىزى بار ازاماتتاردى قولداۋعا باعىتتالعان ءبىرىڭعاي ءتارتىپ ەنگىزىلگەنىن ەسكە سالادى.

«اتاپ وتەيىك، كرەديتتەر بويىنشا مەرزىمى وتكەن بەرەشەگى بار ازاماتتاردى قولداۋ ءۇشىن 2021 -جىلعى قازاننان باستاپ بەرەشەكتى رەتتەۋدىڭ ءبىرىڭعاي مىندەتتى ءتارتىبى ەنگىزىلدى.

كرەديتتەردىڭ مەرزىمى ءوتىپ كەتكەن جاعدايدا قارىز الۋشىلار بانككە نەمەسە ميكروقارجى ۇيىمىنا وتىنىشپەن جۇگىنۋى قاجەت. وندا ولاردىڭ ءوتىنىشى قارالادى جانە پروبلەمالى بەرەشەكتى قايتا قۇرىلىمداۋ شارتتارى ۇسىنىلادى.

قارىزدى قايتا قۇرىلىمداۋ شارتتارى:

- سىياقى مولشەرلەمەسىن تومەندەتۋ؛

- تولەمدى كەيىنگە قالدىرۋ؛

- وتەۋ ءادىسىن وزگەرتۋ؛

- قارىز مەرزىمىن ۇلعايتۋ؛

- مەرزىمى وتكەن نەگىزگى بورىشتى جانە (نەمەسە) سىياقىنى كەشىرۋ، تۇراقسىزدىق ايىبىن (ايىپپۇل، ءوسىمپۇل) ، قارىزعا قىزمەت كورسەتۋگە بايلانىستى كوميسسيالار مەن وزگە دە تولەمدەردى جويۋ جانە تاعى باسقا تۇرىندە بولۋى مۇمكىن.

ەگەر قارىز الۋشى قارىزدى قايتا قۇرىلىمداۋ شارتتارى بويىنشا كرەديتورمەن كەلىسىمگە كەلە الماسا، ول كرەديتوردىڭ جاۋابىن العان كۇننەن باستاپ 15 كۇن ىشىندە اگەنتتىككە جۇگىنۋگە قۇقىلى»، - دەدى ۆەدومستۆودان.

ايتا كەتەيىك، بەرەشەكتى رەتتەۋ تۋرالى شەشىم قارىز الۋشىنىڭ قارجىلىق جاي-كۇيىن جانە ونىڭ قارجى ۇيىمى الدىنداعى مىندەتتەمەلەرىن ورىنداۋ جونىندەگى مۇمكىندىكتەرىن تەرەڭ تالداۋ نەگىزىندە جەكە تارتىپپەن قابىلدانادى.