سولوۆيەۆتىڭ شوۋىنداعى شابۋىلعا رەسەي بيلىگى جاۋاپ بەرۋى كەرەك - مۇحتار قۇل-مۇحاممەد
«سولوۆيەۆ الەمنىڭ كوپتەگەن ەلدەرىندە بۇرىننان نون گراتا العان ادام بولاتىن جانە قازىر بۇكىل جەردەگى سانكسيالىق قارا تىزىمدەردى كوش باستاپ كەلەدى. سوندىقتان ىزا-كەكتىڭ بۋىنان ول ەلدىڭ بارىنە جارماسىپ ۋلى سىلەكەيىن شاشىپ ءجۇر. بۇرىن «روسسيا 1» ءبىرىنشى ارناسىندا ول الماتىعا بومبالاردى «تاستاپ جىبەرۋ» تۋرالى دا ايتقان بولاتىن. باعدارلامانىڭ قوناعى - مەملەكەتتىك دۋمانىڭ دەپۋتاتى ونيشەنكو دا ودان قاتتى شوشىنىپ قالعان ەدى»، - دەدى مۇحتار قۇل-مۇحاممەد.
سونداي-اق، ول سولوۆيەۆتىڭ بارشانى دەگەن جەك كورۋى كەسىرىنەن كوبىنەسە وزەۋرەپ ءوزى سويلەپ، باعدارلامانىڭ مەيماندارىن جانجال مەن ارانداتۋعا يتەرمەلەيتىنىن اتاپ ءوتتى. جانە ونىڭ ءبارى تىكەلەي ەفيردە جانە ەسۋاس كەيپىندە بولاتىنىن تىلگە تيەك ەتتى.
«رەسەيلىك ساياساتتانۋشى دروبنيسكيدىڭ «كەلەسى ماسەلە قازاقستان بولۋى مۇمكىن. ويتكەنى ۇلتشىلدىق ۇردىستەرى سول جەردە دە باستالۋى ىقتيمال» دەگەن سوزىنەن ءبىزدىڭ ەلىمىزگە تىكەلەي قاتەر ءتوندىرۋ انىق بايقالىپ وتىر.
ەگەر ول ەۋرازيالىق ەكونوميكالىق وداق پەن ۇ ق ش ۇ-دا بىزبەن بىرگە تۇرعان وزىمىزگە دوس رەسەيدىڭ مەملەكەتتىك ارناسىنىڭ ەفيرىندە كورسەتىلمەسە، ءدۇدامال ساراپشى-فانتاست دروبنيسكي-جۋكوۆتىڭ پىكىرىنە نازار اۋدارماس ەدىك. رەسەيلىك ساياساتكەرلەردىڭ وسىنداي ەكپىندى، ماقساتتى شابۋىلدارى سولوۆيەۆتىڭ شوۋىندا بۇرىننان جۇيەلى تۇردە جالعاسىپ كەلە جاتقاندىقتان، ولار رەسەي فەدەراتسياسىنىڭ فەدەرالدى بيلىگى تاراپىنان وبەكتيۆتى جاۋاپقا لايىق» دەپ باعا بەردى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى.
ءسوز سوڭىندا مۇحتار قۇل-مۇحاممەد «قازاقستان 30 جىلدان استام ۋاقىت بويى تاۋەلسىز مەملەكەت ەكەنىن، سولوۆيەۆ پەن سول سەكىلدى ساياساتكەرلەر شىنايى شىندىقتى ءتۇسىنىپ، جاڭا گەوساياسي اقيقاتپەن ساناسۋدى ۇيرەنەتىن ۋاقىت كەلگەنىن اتاپ ءوتتى.
