كاسىبي پاتروناتتىق وتباسىن قۇرۋ جوباسى ازىرلەنىپ جاتىر

جاڭا جوبا اياسىندا جەتىمدەر مەن اتا-اناسىنىڭ قامقورلىعىنسىز قالعان بالالاردى بالالار ۇيىنە ەمەس، بىردەن پاتروناتتىق وتباسىنا بەرۋ مۇمكىن بولماق. بۇل بالالاردىڭ اسىراپ الۋشى اتا-انالارىن تەز تاۋىپ، ۇيدە بەيىمدەلۋى ءۇشىن قاجەت.

«اتالعان شارا مەملەكەت باسشىسىنىڭ «ادىلەتتى قازاقستان: ءبارىمىز جانە ءارقايسىمىز ءۇشىن. قازىر جانە ءاردايىم» اتتى سايلاۋالدى باعدارلاماسى اياسىندا جۇزەگە اسىرىلىپ جاتىر. پرەزيدەنت اتاپ وتكەندەي، ءبىز ازاماتتاردىڭ ءبىلىمى، دەنساۋلىعى مەن ءال-اۋقاتىنا جاۋاپتىمىز. بۇگىن ەلىمىزدە بالا اسىراپ الۋدان بولەك، بالالاردى وتباسىنا ورنالاستىرۋدىڭ قورعانشىلىق، قامقورشىلىق، پاتروناتتىق تاربيە، پاتروناتتىق وتباسى سياقتى تۇرلەرى بار. الايدا، اۋىر دەرتى جانە دامۋىندا كەيىن قالۋشىلىق بار سابيلەر بالالار ۇيلەرىندە قالادى. بۇل بالالاردىڭ وتباسىندا تاربيە الۋ مۇمكىندىگىنە يە بولۋى ءۇشىن دەنساۋلىق جاعدايىنا قاراماستان، بارلىق بالانى قابىلداۋعا دايىن كاسىبي پاتروناتتىق وتباسىلار ينستيتۋتى قۇرىلادى. قازىر وقۋ-اعارتۋ مينيسترلىگى كاسىبي پاتروناتتىق وتباسىلاردى زاڭنامالىق تۇرعىدان بەكىتۋ جۇمىسىمەن اينالىسىپ جاتىر»، - دەدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.

كاسىبي پاتروناتتىق تاربيەشىلەرگە قويىلاتىن تالاپتاردى، پسيحولوگيالىق دايىندىق باعدارلاماسىن، الەۋمەتتىك كەپىلدىكتەر مەن تولەمدەر تىزبەسىن جانە ت. ب. ازىرلەۋ جۇمىستارى جۇرگىزىلىپ جاتىر.

بالالاردى كاسىبي پاتروناتتىق وتباسىنا 3 ايعا دەيىن قىسقا مەرزىمگە جانە 3 ايدان كامەلەتكە تولعانعا دەيىن ۇزاق مەرزىمگە بەرۋگە بولادى دەپ جوسپارلانىپ وتىر. بالالاردى تاربيەلەۋگە بەرۋ كەلىسىم نەگىزىندە جۇزەگە اسىرىلادى. اسىراپ الۋشى اتا-انالار بالالارىنىڭ سانىنا جانە ولاردىڭ وتباسىندا بولۋ مەرزىمىنە بايلانىستى ءوز ەڭبەگى ءۇشىن اقى الادى.