مينيستر ماسكەۋ بيرجاسىندا تەڭگە ساتىپ الۋشىلاردىڭ كوبەيگەنى قازاقستانعا قالاي اسەر ەتەتىنىن ايتتى
«ماسكەۋ بيرجاسىندا ينۆەستورلاردىڭ تەڭگەنى جاپپاي ساتىپ الۋى ۇلتتىق ۆاليۋتامىزعا، جالپى قازاقستاندىقتارعا قالاي اسەر ەتەدى؟» - دەپ سۇرادى باق وكىلى.
مينيستر اتالعان تەندەنتسيانىڭ جاعىمدى جاعى دا بار ەكەنىن ايتتى.
«ءبىزدىڭ ۆاليۋتا ماسكەۋ بيرجاسىندا ساتىلىپ جاتىر. ءبىر جاعىنان، بۇل جاقسى كورسەتكىش. ياعني تەڭگەگە سۇرانىس بار دەگەن ءسوز. مەنىڭ ويىمشا، بۇل ترەند تەڭگەنىڭ دوللار مەن باسقا ۆاليۋتالارعا قاتىستى نىعايۋىنا مۇمكىندىك بەرەدى. ال بۇل ينفلياتسياعا دا وڭ اسەرىن تيگىزەدى. سەبەبى ءبىز تاۋارلار مەن ازىق- تۇلىكتىڭ ءبىر بولىگىن رەسەيدەن تاسيمىز. ال رۋبل- تەڭگە باعامى تۋرالى ايتساق، ول نىعاياتىن شىعار»، - دەدى الىبەك قۋانتىروۆ.
ۆەدومستۆو باسشىسى بۇعان دەيىن ءتۇرلى فاكتورلاردىڭ اسەرىنەن تەڭگەنىڭ رۋبلگە شاققانداعى باعامى ازداپ قۇلدىراعانىن ەسكە سالدى.
«قازىرگى فاكتورلاردى ەسكەرە وتىرىپ، تەڭگە كۇشەيەدى دەپ بولجاۋعا بولادى. بۇل ەكونوميكانىڭ سالالارىنا دا وڭ اسەر ەتەدى.
ءبىر جاعىنان، تەڭگە باعامى قازاقستاننىڭ نەگىزگى ساۋدا سەرىكتەستەرىنىڭ ۆاليۋتاسىنىڭ الدىنا تۇسسە، بۇل ءبىزدىڭ ەكسپورتتاۋشىلارىمىز ءۇشىن جاقسى. ويتكەنى ءوز ءونىمىنىڭ 80-90 پايىزىن ەكسپورتقا شىعارىپ، تەك 10 پايىزىن ىشكى نارىقتا ساتاتىن كاسىپورىندار بار. مۇنىڭ ءبارى سۇرانىسقا بايلانىستى»، - دەدى مينيستر.
سونداي- اق، ول ماسكەۋ بيرجاسىنداعى جاعداي قازاقستان نارىعىندا رۋبلدى كوبەيتىپ جىبەرەدى دەگەن بولجاممەن كەلىسپەيتىنىن جەتكىزدى.
«رۋبلمەن نە ىستەيتىنىن ۇلتتىق بانك ءوزى شەشەدى. رۋبل تىم كوبەيىپ كەتەدى دەپ ويلامايمىن. ويتكەنى ءوز ۇلتتىق ۆاليۋتامىز بار عوي. قاجەت بولسا، ۇلتتىق بانك قوسىمشا شىعاراتىن شىعار.
جالپى ءبىزدىڭ رەسەيمەن ساۋدا اينالىمىمىز اۋقىمدى. ال ءبىزدىڭ ەكونوميكاعا رۋبلدىڭ كىرگەنى، تەڭگەنىڭ ماسكەۋ بيرجاسىندا ساتىلىپ جاتقانى قالىپتى پروتسەسس. وندا تۇرعان ەشتەڭە جوق»، - دەدى ۇلتتىق ەكونوميكا ءمينيسترى.
