قىرعىز بايقاۋشىلارى قازاقستانداعى پرەزيدەنت سايلاۋىنا قانداي باعا بەردى
بۇل تۋرالى قىرعىز رەسپۋبليكاسى و س ك جانىنداعى لەيلەك-سۋلۋكتۋ ايماقتىق سايلاۋ كوميسسياسىنىڭ ارنايى وكىلى ابديۆالي حامرايەۆ، ونىڭ ارىپتەسى قىرعىز رەسپۋبليكاسى بىشكەك ا س ك ءتوراعاسى باحادىر كونۋروۆ جانە بايقاۋشى تىلەك شىعاي ايتتى، دەپ حابارلايدى قازاقپارات ءتىلشىسى.
«الماتىدا سايلاۋ جوعارى دەڭگەيدە ۇيىمداستىرىلدى دەپ ەسەپتەيمىز. ءبىز بارعان ۋچاسكەلەردە ەشقانداي زاڭبۇزۋشىلىق بولعان جوق. ءبىز ونداعان ۋچاسكەلىك سايلاۋ كوميسسياسىن ارالادىق. بۇكىل جاعدايدى ۋچاسكەلىك سايلاۋ كوميسسيالارى قاداعالادى. كوميسسيا مۇشەلەرىنىڭ تاجىريبەسى مول، ۋچاسكەلىك سايلاۋ كوميسسيالارىندا سەنىم بىلدىرىلگەن ادامدار، كانديداتتار مەن بايقاۋشىلار دا بولدى»، - دەدى ءابدىۆالي حامرايەۆ.
بايقاۋشى تىلەك شىعاي دا ارىپتەستەرىنىڭ ايتقانىنا قوسىلىپ، پرەزيدەنت سايلاۋىنىڭ ناتيجەلى وتكەنىن ايتتى.
«حالىقارالىق بايقاۋشىلار جانە باسقا دا ارىپتەس رەتىندە قاتىسىپ وتىرعان ەلدەردىڭ اراسىندا جوعارى دەڭگەي بايقالادى. بۇل - قازاقستاندا سايلاۋدىڭ قالاي وتەتىنىنىڭ كورسەتكىشى بولدى دەپ ويلايمىن»، - دەدى ول.
