قازاقستاندىق «اقىن» فيلمى پورتۋگاليا كينوفەستيۆالىندە باس جۇلدەگە يە بولدى

فيلم مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى مەن ۇلتتىق كينونى قولداۋ مەملەكەتتىك ورتالىعىنىڭ قاتىسۋىمەن ءتۇسىرىلدى.

«اقىن» فيلمىندە تەحنولوگيانىڭ دامۋ داۋىرىندە تۇسىنىكسىز جانە ماڭىزدى ەمەس ادام بولۋدان قورقاتىن اقىن تۋرالى باياندالادى. سەناري نەمىس جازۋشىسى گەرمان گەسسەنىڭ «اۆتورلىق كەش» اڭگىمەسىنە نەگىزدەلگەن. تاسپانىڭ ءتۇسىرىلىمى الماتى، الماتى وبلىسىنىڭ قالالارى جانە اتىراۋدا ماحامبەت وتەمىس ۇلى كەسەنەسىنىڭ جانىندا ءوتتى. باستى كەيىپكەردى بەلگىلى ءانشى جانە مۋزىكانت ەردوس قانايەۆ سومدادى»، - دەپ حابارلادى «قازاق فيلم» كينوستۋدياسىنىڭ باسپا ءسوز قىزمەتىنەن.

ەسكە سالساق، فيلمنىڭ الەمدىك پرەمەراسى 2021-جىلى جاپونياداعى 34- توكيو حالىقارالىق كينوفەستيۆالىنىڭ باستى بايقاۋىندا ءوتتى. وندا فيلم «ۇزدىك رەجيسسۋرا» نوميناتسياسى بويىنشا ماراپاتتالدى. كەيىن فيلم گەرمانياداعى 72- بەرلين حالىقارالىق كينوفەستيۆالىندە بايقاۋدان تىس كورسەتىلدى. سونداي-اق، «اقىن» برازيلياداعى Olhar de Cinema حالىقارالىق كينوفەستيۆالىندە «ۇزدىك فيلم» سىيلىعىن جەڭىپ العان بولاتىن.

قازاقستاندا كينو كارتينا وسى جىلدىڭ ءساۋىر ايىندا شەكتەۋلى پروكاتقا شىعارىلدى. سونداي-اق، 14- جەلتوقساننان باستاپ «اقىن» فرانسيا كينوتەاترلارىندا پروكاتقا شىعاتىنى بەلگىلى بولدى.