الماتىلىق جىگىت ورتەنگەن ءۇيدىڭ ىشىندە قالىپ قويعان قارت ادامدى قۇتقاردى
الماتى قالالىق توتەنشە جاعدايلار دەپارتامەنتى 20- قاراشادا تاڭعى 05:20 دا ناۋرىزباي اۋدانىنىڭ «شۇعىلا سيتي» 340/4 تۇرعىن ءۇي كەشەنىنىڭ پاتەرى ورتەنگەنىن حابارلادى.
«وقيعا ورنىنا جەتكەن ساتتە توعىز قاباتتى تۇرعىن ءۇيدىڭ ءبىرىنشى قاباتىندا ورنالاسقان پاتەردىڭ جيھازدارى مەن مۇلىكتەرىنىڭ 16 شارشى مەتر اۋماعى ورتەنگەنى انىقتالدى. قاتتى ءتۇتىن سالدارىنان تۇرعىنداردىڭ ءومىرى مەن دەنساۋلىعىنا قاۋىپ ءتوندى. گاز-تۇتىننەن قورعاۋ قىزمەتى پاتەرلەردە قالعان تۇرعىنداردى ەۆاكۋاتسيالاۋعا جانە ءورتتى سوندىرۋگە كىرىستى. قابىلدانعان شارالاردىڭ ارقاسىندا ءورت 10 مينۋتتان سوڭ وقشاۋلانىپ، تاڭعى 5:47 دە تولىق ءسوندىرىلدى»، - دەپ حابارلادى ت ج د.
سونداي-اق ت ج د- نىڭ مالىمەتىنشە، ءورت ءسوندىرۋ بولىمشەلەرى كەلگەنشە وسى تۇرعىن ءۇي كەشەنىنىڭ 30 جاستاعى تۇرعىنى ەركەبۇلان جاناحمەتوۆ ءوز ءومىرىن قاتەرگە تىگىپ، وپەراتسيادان كەيىن وزدىگىنەن قوزعالا المايتىن قارت كىسىنى ورتتەن قۇتقارعان.
ەركەبۇلاننىڭ ايتۋىنشا، ول ءبىرىنشى قاباتتاعى پاتەرىندە وتىرىپ كومەك سۇراعان داۋىستى ەستىگەن. 72 جاستاعى ەر ادام پاتەرىنىڭ كىرەبەرىسىنە جاقىنداپ، پاتەردەن كەتۋگە تىرىسقان.
«تاڭعا قاراي ۇيقىم كەلمەي، تەرەزەنى اشتىم. سول ساتتە كورشى كورپۋستان شىعىپ جاتقان ءورتتى بايقاپ، ادامدارعا كومەكتەسۋ ءۇشىن سول جەرگە جۇگىردىم. الدىمەن گاز قۇبىرىنىڭ قاقپاعىن جاپتىم. كورشى جىگىت نەمەسە كۋاگەر سىرتقى ەسىكتى تاسپەن تىرەپ، كىرەبەرىستىڭ ەسىگىن اشتى. ءتۇتىن باسقان كىرەبەرىستەن بىرەۋدىڭ كومەك سۇراعان ءالسىز داۋىسىن ەستىدىم. سىرتقا شىعىپ كۋاگەرلەرلەرگە بىرگە كىرۋدى سۇرادىم. ءبىراق، ەشكىم بارمادى. كىرەبەرىستە دەم الۋ مۇمكىن ەمەس بولدى. مۇرنىمدى كەپكامەن جاۋىپ، ورتەنگەن پاتەرگە كىرىپ، ول جەردەن قارت كىسىنى قاۋىپسىز جەرگە شىعاردىم. باتىر اتانۋ مەنىڭ ماقساتىم ەمەس، تەك كومەكتەسكىم كەلدى»، - دەدى ەركەبۇلان جاناحمەتوۆ.
«قازىرگى ۋاقىتتا قۇتقارىلعان 72 جاستاعى ەر ادام جەدەل مەديتسينالىق كومەك اۋرۋحاناسى دارىگەرلەرىنىڭ باقىلاۋىندا. ونىڭ ءومىرى مەن دەنساۋلىعىنا قاۋىپ جوق.
الماتى قالاسى ت ج د باسشىلىعى ق ر ت ج مينيسترلىگىنە الماتى قالاسىنىڭ 30 جاستاعى تۇرعىنى جاناحمەتوۆ ەركەبۇلاندى ماراپاتتاۋعا ۇسىنىس ەنگىزدى»، - دەپ حابارلادى قالالىق ت ج د باسپا ءسوز قىزمەتى.
