استانادا «اق ورامال» اتتى جىر جيناقتىڭ تۇساۋى كەسىلدى
وزگەشە فورماتتا وتكەن شىعارماشىلىق كەشكە اقىن نەسىبەك ايىت ۇلى، قازاقستان جازۋشىلار وداعىنىڭ حاتشىسى، اتالعان وداقتىڭ استاناداعى فيليالىنىڭ ءتوراعاسى، اقىن داۋلەتكەرەي كاپ ۇلى، جازۋشى اسقار التاي، بەلگىلى ابايتانۋشى ومار جالەل، قىتاي قازاقتارىنان شىققان تانىمال ديكتور قىزىربەك جاناسىل ۇلى سەكىلدى استانانىڭ زيالى قاۋىم وكىلدەرى قاتىستى.
ءساليحالى كەش، اقىن جانايىم اۋعانباي قىزىنىڭ اكەسىنىڭ اق باتاسىمەن جانە اقىننىڭ اكەسىنە ارناعان جۇرەك جاردى شىعارماسىمەن باستالدى.
«قازاق پوەزياسنىڭ اراعى-بەرگى تاريحىندا ولەڭمەن ورنەك سالعان مىقتى اقىن قىزدار از بولعان جوق. ۇلبيكە، سارالاردان تارتىپ، كەشەگى فاريزا، بۇگىنگى تاناكوز تولقىن قىزىنا دەيىن ايتار بولساق، جىر كوشىنە اقىق جىرىمەن ءسان قوسقان ايەل اقىندار از ەمەس. بۇگىن مىنە سول كوشكە «اق ورامال» - مەن جانايىم اۋعانباي قىزى قوسىلدى. «اق ورامالدى» پاراقتاپ وتىرىپ، جانايىمنىڭ ولەڭدەرىنەن نازىكتىكپەن قاتار قازاق قىزدارىنا ءتان يبالىلىقتى، بۇيىعى ۇياڭدىقتى بايقادىم. شىنىن ايتايىق، ءبىزدىڭ قازىرگى قازاق قىزدارىنىڭ پوەزياسىندا، باتىستىڭ اسەرىنەن بە، الدە ورىس جازۋشىلارىنىڭ ىقپالى ما، ءبىر ادەپسىزدىك بەلەڭ الىپ بارادى. ولەڭ دەگەن وسى ەكەن دەپ ءبارىن اشىق جازاتىن بولدى دا، قىزدارعا ءتان ادەپتىلىك، تەكتىلىك قاسيەت سۇيىلىپ بارا جاتقان ەدى. جانايىمنىڭ ولەڭدەرى وقىرمانداردى سول قاسيەتپەن قايتا قاۋىشتىردى. مەن وسىعان قۋاندىم»، - دەدى نەسىبەك ايت ۇلى.
اقىن داۋلەتكەرەي كاپ ۇلى جازۋشىلار وداعىنىڭ ءتوراعاسى ۇلىقبەك ەسداۋلەتتىڭ سالەمىن جەتكىزىپ، جازۋشىلار وداعى اتىنان جاقىندا جارىق كورگەن كىتاپتاردى سىيلاپ، جانايىمنىڭ شىعارماشىلىق جولىنا تابىس تىلەدى.
سالتاناتتى ءىس-شارانىڭ سوڭى، جانايىم اۋعانباي قىزىنىڭ سوزىنە جازىلعان اندەر ورىندالعان ادەبي-سازدى كەشكە ۇلاستى.
جانايىم اۋعانباي قىزى قىتاي حالىق رەسپۋبليكاسىندا دۇنيەگە كەلگەن.
«شىنجاڭ تەلەارناسىندا» ديكتور، جۇگىزۋشى بولىپ قىزمەت ىستەگەن ول 2012-جىلى اتاجۇرتقا ورالعان.
اۆتور ريزابەك نۇسىپبەك ۇلى
