استانا كوشەسىنە اسقار زابيكۋليننىڭ ەسىمى بەرىلىپ، بيۋستى ورناتىلادى - پرەزيدەنت

مەملەكەت باسشىسى قىزمەتتىك بورىشىن اتقارۋ كەزىندە اۋىر جاراقات الىپ، اۋرۋحانادا كوز جۇمعان استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى جەدەل كەزەكشىسىنىڭ كومەكشىسى اسقار سەرىك ۇلى زابيكۋليننىڭ دۇنيەدەن وتۋىنە بايلانىستى وتباسى مەن جاقىن تۋىستارىنا كوڭىل ايتۋ جەدەلحاتىن جولدادى.

- اسقار سەرىك ۇلى توتەنشە جاعدايلار سالاسىندا ەڭبەك ەتىپ، ەلىمىزگە ادال قىزمەت ەتۋدىڭ ۇلگىسىن كورسەتە بىلگەن ازامات ەدى. استاناداعى كوپقاباتتى ۇيدە بولعان ءورت كەزىندە وقيعا ورنىنا شۇعىل جەتىپ، بىرنەشە ادامنىڭ ءومىرىن ساقتاپ قالدى. وسى ءبىر ارەكەتى ارقىلى ول وتان الدىنداعى ازاماتتىق انتىنا بەرىك ەكەنىن جانە جانقيارلىق ەرلىگىن كورسەتتى. ونىڭ ەسىمى مەن جارقىن بەينەسى حالقىمىزدىڭ جۇرەگىندە ساقتالادى. مارقۇمنىڭ جانى ءجانناتتا، يمانى سالامات بولسىن، - دەپ جازىلعان جەدەلحاتتا.

سونداي-اق مەملەكەت باسشىسىنىڭ تاپسىرماسى بويىنشا ەرجۇرەك ءورت ءسوندىرۋشىنىڭ ەسىمىن ماڭگى ەستە ساقتاۋ ماقساتىندا استانا قالاسىنداعى كوشەلەردىڭ بىرىنە اسقار زابيكۋليننىڭ ەسىمى بەرىلىپ، ءبيۋستى ورناتىلادى.

ەسكە سالا كەتەيىك، ەلوردادا كوپقاباتتى ۇيدە ءورت بولىپ، 3 ادام، ونىڭ ىشىندە 1 بالا اۋرۋحاناعا ءتۇستى.

ال 3 ادامدى قۇتقارعان استانالىق ءورت ءسوندىرۋشى اسقار زابيكۋليندى %80 كۇيىك شالىپ، جانساقتاۋ بولىمىنە جاتقىزىلدى. سونداي-اق، وعان دوستارى كومەك جينادى.

ودان بولەك، مەملەكەت باسشىسى ەرلىك كورسەتكەن جانە بىرنەشە ادامنىڭ ءومىرىن قۇتقارعان ەلوردالىق ءورت سوندىرۋشىلەردى قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتاۋ تۋرالى جارلىققا قول قويدى.

كۇنى كەشە ونىڭ وتباسىنا ءۇش بولمەلى پاتەردىڭ سەرتيفيكاتى تابىستالعان بولاتىن.

دەنەسىنىڭ 80 پايىزىن كۇيىك شالعان ءورت ءسوندىرۋشى بۇگىن اۋرۋحانادا قايتىس بولدى.