قازاقستانداعى ەڭ ۇزىن كوپىردىڭ قۇرىلىسى توقتاۋى مۇمكىن
پارلامەنت سەناتىنىڭ دەپۋتاتى باقىتجان باياحمەتوۆ بۇقتىرما سۋ قويماسى مەن ەرتىس وزەنى ارقىلى وتەتىن كوپىرلەر قۇرىلىسىن قارجىلاندىرۋ قارقىنىنا كوڭىلى تولمايتىنىن جەتكىزدى. ونىڭ ايتۋىنشا، قۇرىلىستى 2023-جىلى جالعاستىرۋ ءۇشىن 20 ميلليارد تەڭگە سۇراعان. ءدال وسىنداي سوما 2024-جىلعا دا قاجەت بولادى.
«مەملەكەت باسشىسىنىڭ تاپسىرماسىن ۋاقتىلى ءارى ساپالى ورىنداۋ ءۇشىن رەسپۋبليكالىق بيۋجەتتەن 2023-جىلى 20 ميلليارد تەڭگە سوماسىندا، ال 2024-جىلى بۇقتىرما سۋ قويماسى ارقىلى وتەتىن كوپىر وتكەلىن سالۋعا 21,8 ميلليارد تەڭگە سوماسىندا قاراجات ءبولىنۋ قاجەت»، - دەدى باقىتجان باياحمەتوۆ.
شىعىس قازاقستان وبلىسى كۇرشىم اۋدانىنىڭ اكىمدىگى بۇل جاعدايعا قاتىستى تۇسىنىكتەمە بەردى. مۇندا ولار كەلەسى جىلعا رەسپۋبليكالىق بيۋجەتتەن 20 ميلليارد سۇراعانىن راستادى، ءبىراق كوپىر قۇرىلىسىن كەيىنگە قالدىرۋ تۋرالى اڭگىمە بولماعانىن اتاپ ءوتتى.
«مەملەكەت باسشىسىنىڭ بۇقتىرما سۋ قويماسى ارقىلى وتەتىن كوپىر قۇرىلىسى تۋرالى تاپسىرماسىن ۋاقتىلى جانە ساپالى ورىنداۋ ءۇشىن 2023-جىلعا ارنالعان رەسپۋبليكالىق بيۋجەتتەن 20 ميلليارد تەڭگە سۇرالدى، جۇمىس كەستەگە سايكەس جۇرگىزىلىپ جاتىر. 2024-جىلى پايدالانۋعا بەرىلەدى دەپ جوسپارلانىپ وتىر. الاڭداۋعا نەگىز جوق»، - دەپ جاۋاپ بەردى اۋدان اكىمدىگى.
