قازاقستاندا قۇرساقتاعى بالانىڭ ومىرتقاسىنا دا وپەراتسيا جاسالادى - سەرىك اقشولاقوۆ

بۇگىن «Jibek Joly» تەلەارناسىندا «سۇحبات» ءلايلا سۇلتان قىزىمەن» باعدارلاماسىندا «ۇلتتىق نەيروحيرۋرگيا ورتالىعى» ا ق باسقارماسىنىڭ ءتوراعاسى، بىلىكتى نەيروحيرۋرگ سەرىك اقشولاقوۆ ايتتى، دەپ حابارلايدى قازاقپارات ءتىلشىسى.

«جاقىندا بىزگە فلوريدادان تانىمال نەيروحيرۋرگ (Samer Elbabaa) كەلدى. وسىعان دەيىن ونىمەن ا ق ش- تا تانىسقان بولاتىنمىن. ول پروفەسسور جاتىرداعى بالاعا، ياعني ومىرتقاسى دۇرىس بىتپەگەندەرگە (Spina Bifida اۋرۋى) نەيروحيرۋرگيالىق وپەراتسيا جاسايدى. مۇنداي وپەراتسيانى جاسايتىن الەمدە 3-4 مەملەكەت بار. اتالعان نەيروحيرۋرگ بۇل باعىتتا ءبىراز وپەراتسيانى وتكىزدى»، - دەدى سەرىك اقشولاقوۆ.

وسى ورايدا ۇلتتىق نەيروحيرۋرگيا ورتالىعىنىڭ باسشىسى ا ق ش- تىڭ نەيروحيرۋرگتەرى قازاقستانداعى مەديتسينالىق ۇيىمدار جايىندا جاقسى بىلەتىنىن اتاپ ءوتتى.

«پروفەسسور قازاقستانعا ءبىر كۇنگە ارنايى كەلىپ، ءبىزدىڭ ورتالىقتىڭ جۇمىسىمەن ەگجەي-تەگجەيلى تانىستى. ا ق ش عالىمى بايانداما جاساعاننان كەيىن، ءبىزدىڭ جاس ماماندار وزدەرىن قىزىقتىرعان تاقىرىپتار بويىنشا جاپپاي سۇراقتارىن قويدى. اتاپ ايتقاندا، ءبىزدىڭ ورتالىقتاعى جاس حيرۋرگتەردىڭ، قىزمەتكەرلەردىڭ 90 پايىزى اعىلشىن ءتىلىن ەركىن مەڭگەرگەن. وزدەرىنىڭ عىلىمي جۇمىستارىن شەتەلدەگى فورۋمداردا تانىستىرىپ، ۇلتتىق نەيروحيرۋرگيا ورتالىعىنىڭ جەتىستىكتەرىن شەتەلدە كورسەتىپ تۇر. وسى ورايدا شەتەل عالىمى ءبىزدىڭ جاستاردىڭ الەمدىك مەديتسيناداعى تەرميندەردى، اعىلشىن ءتىلىن جاقسى مەڭگەرگەنىن كورىپ، تاڭداندى»، - دەدى س. اقشولاقوۆ.

بۇل تۇرعىدا ول بولاشاقتا اتالعان كۇردەلى وپەراتسيانى قازاقستاندا وتكىزۋ جوسپارى بار ەكەنىن ءمالىم ەتتى.

«وسى ساپار اياسىندا ونىمەن ءتيىستى كەلىسسوز جۇرگىزىپ، اتالعان وپەراتسيانى ەلىمىزدە جاساۋ جوسپارىن كەلىستىك. بۇل دەرتتى ۋاقىتىلى ەمدەمەسە، بالا تۋعاندا سال اۋرۋىنا شالدىعادى. مۇنداي وپەراتسيادان كەيىن بالانىڭ پاراليچ بولماۋىنا جاعداي جاسالادى»، - دەدى عالىم.