ۋكرايناداعى قازاق بيزنەسى تابىسىن ەسەلەدى

جاڭا جىلعا دەيىن قوس تاراپ بيزنەس فورۋمنىڭ تالقىلايتىن تاقىرىبىن پىسىقتاپ، لوگيستيكالىق مۇمكىندىگىن قاراستىرماقشى. قارۋلى قاقتىعىستاردان تۋىنداعان قيىندىقتارعا قاراماستان قازاق بيزنەسى ۋكراينادا قارقىندى دامىپ جاتىر. ەلدەگى ءىرى كاسىپ يەسى الىشەر ءتاجين ارنامىزعا ەكسكليۋزيۆتى سۇحبات بەرىپ، وسىلاي دەدى.

قازاقستانعا تيەسىلى ءىرى حالىقارالىق حولدينگتە باسشىلىق ەتەتىن بيزنەسمەن جيتومير، ۆينناتسا، حمەلنيتسك وڭىرىندەگى 24 مىڭ گەكتار جەرگە بەس ءتۇرلى مادەني وسىمدىكتەردى ەگىپ، ونى ساقتاۋ مەن ساتۋدا تابىستارعا جەتكەنىن ايتادى. قازاق كومپانياسىنىڭ 90 مىڭ توننا ءونىمدى ساقتاي الاتىن ەليەۆاتورى، ءتۇرلى تەحنيكا، ۆاگون، كومبايندارى بار. جىلدىق تابىسى 11 ميلليون دوللاردى قۇراعان. 400 ۋكراينالىق ازاماتتى جۇمىسپەن قامتىپ وتىر، سوعىس باستالعالى بىردە- ءبىر قىزمەتكەرىن قىسقارتپاعان.

الىشەر ءتاجين، ۋكرايناداعى قازاقستاندىق كومپانيانىڭ باسشىسى:

- ەلەكتر قۋاتىمەن، وتىنمەن، تاۋارلىق- ماتەريالدىق قورلارمەن پروبلەمالار تۋىنداسا دا، قىزمەتىمىز توقتاعان جوق. سوعىس باستالعاندا لوگيستيكا تولىعىمەن تۇرالاپ قالادى دەپ ويلاعانبىز، الايدا ءبىز ەۋروپالىق باعىتتى اشا بىلدىك. بۇرىن ءبىز ءونىمدى ودەسسا پورتى ارقىلى عانا ساتقان بولساق، ەندى پولشا، مولدوۆا، رۋمىنيا، ۆەنگرياعا بارا باستادىق، ياعني جاڭا سەرىكتەستەر، جاڭا كومپانيالار مەن جاڭا كليەنتتەر تابىلدى.

جيتومير وڭىرىندەگى ءۇش مەكەمەدە ديىرمەنى بار تاعى ءبىر ءىرى بيزنەس يەسى - التىنبەك مۋستاپايەۆ. جەرلەسىمىز كۇنىنە 80 توننا ۇن شىعارىپ، جۇزدەگەن ادامدى ەڭبەكپەن قامتىپ وتىر. ميلليون گريۆەننەن استام قاراجاتتى سوعىس باستالعاننان بەرى قايىرىمدىلىق سالاسىنا قۇيعان. وننان استام قىزمەتكەرى سوعىس شەبىندە ءجۇر. جىراقتا جۇرسە دە كاسىپكەر قازاقستاننىڭ مادەني، ەكونوميكالىق، ساياسي جاڭالىقتارىن ءجىتى قاداعالاپ وتىرادى.

التىنبەك مۋستاپايەۆ، ۋكرايناداعى قازاقستاندىق كومپانيانىڭ باسشىسى:

- ەشقانداي قيىندىققا قاراماستان جۇمىس ىستەپ جاتىرمىز. ۋكراينا ارمياسىنا كومەكتەسىپ جاتىرمىز، مەن ويلايمىن قازىر اركىم ءوز جۇمىسىن ىستەۋ كەرەك. مىنە، كورىپ تۇرسىزدار، ۋكراينا جەرىندە قازاقتىڭ تۋى جەلبىرەپ تۇر. ءارقاشاندا قازاقستاندا بولىپ جاتقان جاڭالىقتاردى قاراپ وتىرامىز، قولدان كەلگەنشە رەفەرەندۋم، سايلاۋ بولسىن وعان دا قاتىسىپ تۇرامىز.

جاڭا جىلدان كەيىن ۋكراينانىڭ لۆوۆ قالاسىندا ەكى ەل اراسىنداعى حالىقارالىق بيزنەس فورۋم ءوتۋى مۇمكىن. وندا قوس ەلدىڭ بيزنەس سالاسىنداعى تۇيىتكىلدەر شەشىلەدى. بۇل تۋرالى ۋكرايناداعى قازاقستان ەلشىسى دارحان كالەتايەۆ پەن ۋكراينا ساۋدا ونەركاسىپ پالاتاسىنىڭ ءتوراعاسى گەننادي چيجيكوۆتىڭ كيەۆتەگى كەزدەسۋى كەزىندە ايتىلدى.