ەۋروكوميسسيا شەنگەن ايماعىنا تاعى ءۇش مەملەكەتتى كىرگىزۋدى ۇسىندى
تىزىمدە بولگاريا، رۋمىنيا مەن حورۆاتيا بار. اتالعان ەلدەر ۆيزاسىز ساياحات ايماعىنا قوسىلۋ ءۇشىن بارلىق تالاپتاردى ورىنداعان دەلىنگەن. رەسمي بريۋسسەل شەنگەن ايماعىنىڭ ۇلعايۋى ەۋروپانىڭ قاۋىپسىزدىگىن ارتتىرادى دەپ ەسەپتەيدى. ماسەلەن، سىرتقى شەكارا نىعايسا، ىشكى شەكارالىق باقىلاۋ بولمايتىن كورىنەدى. جەلتوقساندا بۇل ماسەلەگە قاتىستى ادىلەت كەڭەسى داۋىس بەرەتىن بولادى.
يلۆا يوحانسسون، ىشكى ىستەر ەۋروكوميسسارى:
- شەنگەن اۋماعى - ەۋروپالىق وداقتىڭ ۇلكەن جەتىستىكتەرىنىڭ ءبىرى. مەملەكەتارالىق بايلانىس ىشكى نارىقتى نىعايتىپ، ەكونوميكانىڭ العا باسۋىنا ءارى حالىقتىڭ تۇرمىس دەڭگەيىن جاقسارتۋعا زور ۇلەس قوسادى. بولگاريا، رۋمىنيا مەن حورۆاتيا دا شەنگەنگە قوسىلۋعا دايىن. بۇل ەلدەر قويىلعان تالاپتاردىڭ بارلىعىن جوعارى دەڭگەيدە ورىنداپ شىقتى.
