قاڭتاردا دۇكەن توناعانداردىڭ جازا مەرزىمى قىسقارادى

بۇل تۋرالى الماتى قالاسى بويىنشا قىلمىستىق-اتقارۋ جۇيەسى دەپارتامەنتىنىڭ باسپا ءسوز قىزمەتى ءمالىم ەتتى.

ۆەدومستۆو مالىمەتىنشە، الماتى قالاسى بوستاندىق اۋداندىق پروباتسيا قىزمەتى باقىلاۋىندا قاڭتار وقيعاسىنا قاتىستى قىلمىس جاساعانى ءۇشىن 9 سوتتالعان ەسەپتە تۇر. ولار سوتتىڭ شەشىمى بويىنشا اۋىر قىلمىس جاساعاندار دەپ تانىلعان.

«پروباتسيا باقىلاۋىندا تۇرعانداردىڭ اراسىندا ەكى ادام Magnum جانە Sulpak ساۋدا ۇيلەرىن توناۋعا قاتىسقان. وسىنداي قىلمىس جاساعانداردىڭ اراسىندا كامەلەتكە تولماعان بالا دا بار. زاڭ تالاپتارىنا سايكەس قاڭتار وقيعاسى كەزىندە قىلمىس جاساعان 9 سوتتالعاننىڭ دا جازاسىن وتەۋ مەرزىمى قىسقارتىلادى. قازىر ولاردىڭ ءىسى بوستاندىق اۋداندىق سوتىنا جولداندى»، - دەيدى بوستاندىق اۋداندىق پروباتسيا قىزمەتىنىڭ ينسپەكتورى، ادىلەت مايورى اينۇر ايكەنوۆا.

ەسكە سالايىق، بۇعان دەيىن قاڭتار وقيعاسىنا قاتىسقان قانشا ادامعا راقىمشىلىق جاسالاتىنى بەلگىلى بولعانى حابارلانعان ەدى.