توقايەۆ الماتىنىڭ پروبلەمالارىن اتادى
«الماتىنىڭ تاريحي ورتالىعى - ءومىر ءسۇرۋ ءۇشىن اسا قولايلى جەر. قاجەتتى نارسەنىڭ ءبارى جاقىن جەردە ورنالاسقان. الايدا، ورتالىقتىڭ وزىنە ءتان تۇيتكىلدەرى بار. اتاپ ايتقاندا، كوممۋنالدىق جۇيە توزىپ بارادى. عيماراتتار ءبىر-بىرىنە وتە تىعىز ورنالاسقان. جولداردا كەپتەلىس كوپ. سونداي-اق، شەتكەرى اۋدانداردىڭ دامۋى تىم كەنجە قالىپ وتىر. الەۋمەتتىك نىساندار جەتىسپەيدى. جۇرت سەرۋەنگە باراتىن ساياباقتار تاپشى. نەگىزىنەن جەر ۇيلەر كوپ سالىنعان. ءتىپتى، قىس ايلارىندا قارا ءتۇتىن قاپتايدى. ازاماتتاردىڭ دەمالىسىن پايدالى وتكىزەتىن قوعامدىق ورىندار از. كولىك جانە ينجەنەرلىك ينفراقۇرىلىم دا جەتكىلىكسىز. اكىمدىكتىڭ باستى مىندەتىنىڭ ءبىرى - ورتالىق پەن شەتتەگى اۋدانداردىڭ اراسىندا پايدا بولعان وسى تەڭسىزدىكتى جويۋ. قالا - بارىنە ورتاق. سوندىقتان، قالانىڭ يگىلىكتەرى دە بارلىق تۇرعىندارعا بىردەي قولجەتىمدى بولۋعا ءتيىس»، - دەدى مەملەكەت باسشىسى كەزدەسۋدە.
سونىمەن قاتار پرەزيدەنت ۇيلەردىڭ تىعىز سالىنۋ ماسەلەسىن كوتەردى.
«جۇرتتىڭ نارازىلىعىن تۋدىراتىن تاعى ءبىر ماڭىزدى ماسەلە - ۇيلەردىڭ تىعىز سالىنۋى. تاك نازىۆاەمايا توچەچنايا زاسترويكا يلي «چەلوۆەينيكي». وسىنداي قۇرىلىستار جانە جولداردىڭ ىڭعايسىز سالىنۋى كوپ قولايسىزدىق تۋدىرىپ وتىر. الماتى زاماناۋي ۋربانيستيكا تالاپتارىنا ساي بولۋى كەرەك. قالامىز بەتوننان سالىنعان ورمانعا اينالماۋعا ءتيىس. سونداي-اق، الاتاۋدىڭ سامالى قالادا ەركىن ەسۋى قاجەت. بۇل قالانىڭ ەكولوگياسى ءۇشىن وتە ماڭىزدى. قالا سالۋ كەزىندە قۇرىلىس كومپانيالارىنىڭ ەمەس، ەڭ الدىمەن، تۇرعىنداردىڭ مۇددەسى ەسكەرىلۋى كەرەك. زاڭدارىمىزدا بۇل جاعداي ناقتى رەتتەلمەگەن. ۇكىمەتكە اكىمدىكپەن بىرلەسىپ، وسى ماسەلەنى پىسىقتاپ، زاڭعا ءتيىستى تۇزەتۋلەر ازىرلەۋدى تاپسىرامىن. مۇنىڭ ءبارى الماتىنى مەيلىنشە جايلى، قولايلى قالا رەتىندە ودان ءارى دامىتۋ ءۇشىن قاجەت. شاھاردا بوتانيكالىق باق سياقتى قوعامدىق ورىندار كوپ بولۋعا ءتيىس. كەيبىر اۋدانداردا وسىنداي نىساندار مۇلدەم جوق. قالا اكىمدىگى وسى احۋالدى تۇبەگەيلى وزگەرتۋدى كوزدەپ وتىر. جۇرتتىڭ دەمالۋىنا ارنالعان بەس ورتالىق سالۋ جوسپاردا بار. مەن مۇنى تولىق قولدايمىن. ءبىراق، جۇمىستى ساپالى ورىنداۋ قاجەت»، - دەپ تولىقتىردى قاسىم-جومارت توقايەۆ.
