ءبىر ولىمنەن امان قالعانىمىزعا قۋاندىق. تۇركياداعى قازاق ىستامبۇل كوشەسىندەگى جارىلىس تۋرالى ايتتى

سالدارىنان 6 ادام قازا تاۋىپ، 81 ادام زارداپ شەكتى. قالا تۇرعىنى بەيىمبەت زايد ەلدەگى قازىرگى احۋال تۋرالى ايتىپ بەردى.

بەيىمبەت زايد جەكە كاسىپپەن اينالىسادى. ءبىر جىلدان بەرى تۇركيادا تۇرىپ جاتىر. ونىڭ سوزىنشە، ەلگە كوشكەندەگى ماقسات - تۇرىك حالقىن ىشىنەن تانىپ ءبىلۋ، وندىرىستەرىن، تۋريزم سالاسىن زەرتتەۋ، ءتىل ۇيرەنۋ جانە جاڭا دوستار تابۋ بولعان. بەيىمبەت جارىلىس بولعان كۇنى نە ىستەگەنىن ايتتى.

«ءبىزدىڭ وتباسىمىزدا اپتانىڭ ءار سەنبى نەمەسە جەكسەنبىسى وتباسىلىق كۇن. ول كۇنى ۇنەمى ساۋدا ورتالىقتارىنا جانە تۋريستىك جەرلەرگە بارىپ سەرۋەندەۋ ادەتىمىز بار. وسىلاي بۇل قايعىلى كۇنى دە ءبىز تاكسيم الاڭى جانىنداعى، يستيكليال كوشەسىندە جارىلىس بولعان ساتتە جۇردىك. الدىمىزدا نە كۇتىپ تۇرعانىن بىلمەدىك. جارىلىسقا 30 مينۋت قالعان كەزدە تۇرىك دوسىمىزدىڭ سول كوشەنىڭ بويىندا ورنالاسقان قوناقۇيىنە كىرىپ امانداسىپ شىعايىق دەدىك. وسىلايشا، جارىلىس بولعان كوشەدەن بۇرىلىپ كەتتىك. دوسىمىز شاي، كوفە ۇسىنىپ، اڭگىمە ايتايىق دەپ ءبىزدى 30 مينۋتقا قالدىردى. ەگەر ول قالۋدى ۇسىنباعاندا ءبىز كەرى سول يستيكليال كوشەسىندە سەرۋەنىمىزدى جالعاستىرعالى وتىرعانبىز…»، - دەيدى بەيىمبەت.

ولار وتباسىمەن دوستارىنىڭ قوناقۇيىندە شاي ءىشىپ وتىرعان ساتتە گۇرس ەتكەن قاتتى داۋىستى ەستىگەن.

«نە بولدى دەپ شىقساق، بارلىق ادام قاشىپ بارا جاتىر ەكەن. بىزدە ەش وي جوق، ءبىراق ءبىر جامان جاعداي بولعانىن تۇسىندىك. دەرەۋ قىزىمىزدى بالاارباعا وتىرعىزىپ، حالىقپەن بىرگە بۇل اۋداننان الىسقا قاشتىق. ءبىراق، پوليتسيا قىزمەتكەرلەرى اۋداندى تولىعىمەن قورشاپ، اۋدان ىشىندە قالعانداردى كەزەكپەن شىعاردى. تاكسي، مەترو، كولىك تۇراقتارى بىردەن جابىلدى. بارلىعىندا دۇربەلەڭ، جارىلىس قايتالانۋ قاۋىپى بولدى. سەبەبى ول كەزدە جارىلىس جاساعان قىلمىسكەرلەر ءالى تابىلماعان ەدى»، - دەيدى قازاقستاندىق.

وسى كەزدە اسپاننان تىكۇشاقپەن، جەردە ارنايى اسكەرلەر تەرگەۋ جۇمىستارىن جۇرگىزە باستاعان.

«ءبىز ناقتى نە جاعداي بولعانىن بىلمەدىك. سول ساتتە ينتەرنەتتى دە ءوشىرىپ تاستادى. كوشەدە كەتىپ بارا جاتقاندار «ادام ءوز-ءوزىن جاردى، ءبىراز ادام قازا بولدى» دەپ ايعايلاپ، جىلاپ ءجۇردى. تاكسيم اۋدانى، يستيكليال كوشەسى 20 ميلليون تۇرعىنى بار ىستامبۇل قالاسىنىڭ تۋريستەر كوپ جينالاتىن ورنى بولىپ سانالادى. سەبەبى اۋەجايعا ۇشىپ كەلگەن ءار تۋريست ەڭ الدىمەن وسى اۋدانعا كەلىپ، ودان سوڭ ءوز قوناقۇيلەرىنە وسى جەردەن بارادى. ىستامبۇلدا بولعان ءار وتانداسىمىز ونى بىلەتىن شىعار. سودان ءبىز 2 ساعات دەگەندە 2 جاستاعى قىزىمىزبەن ول اۋداننان جاياۋ ءجۇرىپ شىعىپ كەتتىك. سەبەبى، جوعارىدا ايتىپ وتكەنىمدەي، بارلىق كولىك ءتۇرى توقتاتىلدى. وسىلاي ءبىر ولىمنەن امان قالعانىمىزعا قۋاندىق، بارلىعىنا ريزاشىلىعىمىزدى ءبىلدىرىپ، امان- ساۋ ۇيىمىزگە ورالدىق»، - دەيدى بەيىمبەت.

بەيىمبەتتىڭ سوزىنشە، تۇركيالىقتار بۇل جايتتى اۋىر قابىلداعان.

«سول ساتتە ادامداردىڭ كوڭىل كۇيى وتە ناشار ەدى. تەك سول جەردەگى ادامدار ەمەس، بارلىق 85 ميلليون تۇرىك حالقى ۋايىمدادى. سەبەبى VPN ارقىلى ينتەرنەتكە كىرگەنىمىزدە تەك وسى جاڭالىق تالقىلانىپ جاتتى. كوشەدە جىلاپ تۇرعان ازاماتتاردى كورىپ بۇل حالىقتىڭ باسقانىڭ قايعىسىنا ورتاقتاسا بىلەتىنىنە تاعى كوزىمىزدى جەتكىزدىك»، - دەيدى بەيىمبەت.

ىستامبۇل تۇرعىنىنىڭ سوزىنشە، ەلدە جارىلىستىڭ بىرنەشە سەبەبى تالقىلانىپ جاتىر.

«ەڭ العاشقى نۇسقادا سيريا ەلىنىڭ ازاماتى دەپ ايتىلدى، ودان سوڭ كۇرد ۇلتىنىڭ ازاماتى بولۋى مۇمكىن دەپ ايتىلدى. تۇركيادا سيريا ەلىنەن قاشىپ كەلگەن 5 ميلليوننان اسا بوسقىن تۇرادى، ولار ءوز ەلىندە حاۋس تۋعىزعانىمەن قويماي، بۇل ەلدىڭ دە ىشىنەن ءوز ساياساتتارىن جۇرگىزىپ جاتىر. تۇرىك مەملەكەتى سيريادا سوعىس باستالعان ۋاقىتتا، ول ازاماتتاردى ۋايىمداپ، كومەك ءبىلدىرىپ، ءوز ەلىنە كىرۋگە رۇقسات بەرىپ، تۇرىك ازاماتتارىنان دا جوعارى دەڭگەيدەگى جاعداي جاسادى. ءبىراق ول كىسىلەردىڭ كوبى بۇل مەيىرىمدىلىكتى قولدانىپ، وزدەرىنىڭ جامان تۇسىن تۇرىك مەملەكەتى ىشىندە كورسەتە باستادى»، - دەيدى بەيىمبەت.

سول ءۇشىن تۇرىك مەملەكەتى ول سيريا ازاماتتارىن سوڭعى 2-3 جىلدا قىسپاققا الىپ، ەلدەن شىعارۋعا ارەكەت ەتىپ جاتىر ەكەن.

«ال جاقسى ومىرگە ۇيرەنىپ قالعان بوسقىندارعا بۇل ۇنامادى. سوندىقتان سيريا ازاماتتارى كۇرد ۇلتىنىڭ قىلمىستىق توپتارىمەن بىرىگىپ وسىلاي ءارتۇرلى تەرروريستىك ارەكەتتەر جاساپ كەلەدى. بىلتىر دا تۇركيا ورماندارىن ورتەگەن سولار دەپ بولجام جاسالدى. تۇرىك ازاماتتارىنىڭ ويىنشا، تۇركياداعى بوسقىن بولىپ جۇرگەن سيريا حالقى وسىلاي ەل ىشىندە حاۋس تۋعىزىپ، تۋريستەردى قورقىتىپ، حالىقتى ازعىنداپ، ەل ەكونوميكاسىن السىرەتىپ، كەيىن تۇركيانى باسىپ الۋعا ارەكەتتەنىپ ءجۇر»، - دەپ ويىن ايتتى بەيىمبەت.

جارىلىستان كەيىن سول اۋداندا جانە دە ءبىرقاتار مەملەكەتتىك مەكەمەدە، وقۋ ورىندارى مەن تۋريستىك جەرلەردە قورعانىس كۇشەيتىلگەن.

«ءبىراق ءبارىنىڭ جۇمىسى تولىق توقتاپ قالعان جوق. تۇركيا مەكتەپتەرىندە 1 اپتادان بەرى توقساندىق دەمالىس، سوندىقتان بالالارعا ەش قاۋىپ ءتونىپ تۇرعان جوق. مۇنداي جاعدايلار تۇركيادا ۇنەمى بولىپ تۇراتىندىقتان، بيلىك پەن اسكەري كۇش ءار كەز دايىن وتىرادى. حالىققا دا قيىن ساتتە قالاي قورعانۋ كەرەگىن الدىن الا ايتىپ قويعان»، - دەيدى قالا تۇرعىنى.

اقپارات دەرەككوزى: massaget.kz