شىمكەنتتە قىزدى كۇشتەپ الىپ قاشقاندار ۇستالدى

الەۋمەتتىك جەلىدە كولىككە قىزدى كۇشتەپ سالىپ، الىپ قاشقان جىگىتتەردىڭ ۆيدەوسى تارادى. جەلى بەلسەندىسىنىڭ جازۋىنشا، وقيعا شىمكەنت قالاسىنداعى جاتاقحانالاردىڭ ءبىرىنىڭ الدىندا بولعان.

«اتالعان وقيعا ق ر ق ك- ءنىڭ 125- بابىمەن «ادام ۇرلاۋ» تىركەلدى. پوليتسيا قىزمەتكەرلەرى تەكسەرۋ جۇرگىزىپ، بەينەجازبادا كورسەتىلگەن تۇلعالاردى انىقتادى. جاۋاپ الۋ بارىسىندا تۇركىستان وبلىسىنىڭ تۇرعىنى شىمكەنت قالاسىنداعى وقۋ ورىندارىنىڭ بىرىندە ءبىلىم الىپ جۇرگەن تانىس قىزدى ۇيلەنۋ ماقساتىندا ۇرلاپ كەتكەنى انىقتالدى. قىز نەكەدەن باس تارتقانىن جانە بولعان جايتقا قاتىستى ەشكىمگە ەشقانداي شاعىمى جوق ەكەنىن جەتكىزدى. قازىرگى تاڭدا تەرگەپ-تەكسەرۋ جۇرگىزىلۋدە»، - دەلىنگەن شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى تاراتقان حابارلامادا.

ال، ۆيدەوعا پىكىر جازۋشىلاردىڭ ءبىر بولىگى ەكى جاسقا باقىت تىلەسە، كەي پىكىر بىلدىرۋشىلەر جىگىتتەردى سوتتاۋ كەرەكتىگىن ايتقان. «جابايىلىق، ناداندىق، وڭباعان ادامدار جاسايتىن تىرلىك»، «زاڭعا وزگەرىس ەنگىزبەي ەشنارسە وزگەرمەيتىن سياقتى»، دەپ پىكىر بىلدىرگەندەردە بار.