باقىتگۇل حامەنوۆاعا قاتىستى سوت ۇكىمى شىقتى

بۇگىن اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانىڭ ىسىنە قاتىستى سوت وتىرىسى قايتا جالعاستى. سوت ونى ق ر قىلمىستىق كودەكسىنىڭ 366-بابىنىڭ 3-ءبولىمىنىڭ 2-تارماعىمەن (ءىرى كولەمدە پارا الۋ) كىنالى دەپ تانىپ، 7 جىلعا باس بوستاندىعىنان ايىرۋعا ۇكىم شىعاردى.

«سوت باقىتگۇل حامەنوۆانىڭ قابىلداعان انتتى بۇزۋ ارقىلى قىلمىس جاساعانىن جازانى اۋىرلاتاتىن جاعداي دەپ تانىدى. جەڭىلدەتەتىن ءمان-جاي رەتىندە جاس بالالارىنىڭ بارى ەسكەرىلدى. سوتتالۋشىعا ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا، 7 جىل مەرزىمگە باس بوستاندىعىنان ايىرۋ جازاسى تاعايىندالدى. ەكى جاس بالاسىنىڭ بولۋىنا بايلانىستى ق ر قىلمىستىق كودەكسىنىڭ 74-بابىنىڭ 1-بولىگىنە سايكەس جازانى وتەۋ مەرزىمى 3 جىلعا كەيىنگە قالدىرىلدى»، - دەلىنگەن سوتتىڭ حابارلاماسىندا.

سونىمەن قاتار باقىتگۇل حامەنوۆا «قۇرمەت» وردەنىنەن ايىرىلدى.

سوت ۇكىمى زاڭدى كۇشىنە ەنگەن جوق.

اتىراۋداعى №2-قالالىق سوتتا باقىتگۇل حامەنوۆاعا قاتىستى سوت وتىرىسى 11-تامىزدا باستالعان ەدى. ايىپتاۋ اكتىسى 55 بەتتەن تۇرادى.

سوت وتىرىسىندا باقىتگۇل حامەنوۆا وزىنە تاعىلعان ايىپتى مويىنداعان جوق.

قازاننىڭ 31-كۇنى وتكەن سوت وتىرىسىندا پروكۋراتۋرا وكىلى باقىتگۇل حامەنوۆانى 7 جىلعا باس بوستاندىعىنان، «قۇرمەت» وردەنىنەن ايىرۋدى ۇسىندى.

ەسكە سالا كەتەلىك، بۇدان بۇرىن باقىتگۇل حامەنوۆانىڭ ىسىنە قاتىستى سوت وتىرىسى قايتا جالعاسقانىن جازعان ەدىك.

بۇگىن، 14-قاراشادا وتكەن سوت وتىرىسىندا اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆاعا سوڭعى ءسوز بەرىلدى.

«مەنىڭ بۇل قىلمىستىق وقيعاعا قاتىسىم بولعان جوق. وسى ءىس بويىنشا زاڭعا سايكەس اقتاۋ ۇكىمى شىعارىلۋى مۇمكىن»، - دەدى باقىتگۇل حامەنوۆا.