قىتاي ءتوراعاسى شي جينپيڭ مەن ا ق ش پرەزيدەنتى دجو بايدەن كەزدەستى
ساياساتكەرلەردىڭ كەلىسسوزى ءبىر ساعاتتان استام ۋاقىتقا سوزىلدى. تاراپتار تايۆان ماسەلەسى، ۋكرايناداعى احۋال مەن سولتۇستىك كورەيانىڭ يادرولىق سىناعىن جان- جاقتى تالقىلادى.
اقپارات كوزدەرىنىڭ حابارلاۋىنشا، شي جينپيڭ، ۆاشينگتوندى تايۆان ماسەلەسىنە قاتىستى ۇستامدىلىق ساقتاۋ كەرەكتىگىن ەسكەرتتى. «سونىمەن قاتار قىتاي مەن ا ق ش اراسىنداعى قارىم- قاتىناستىڭ دامۋىنا ەكى تاراپتىڭ دا بىرلەسىپ جاساعان ءىس- ارەكەتتەرى ماڭىزدى»، - دەدى.
شي جينپيڭ، ق ح ر ءتوراعاسى:
- ەكى ءىرى مەملەكەتتىڭ باسشىسى رەتىندە قارىم- قاتىناسىمىزدىڭ دۇرىس بولۋى وتە ماڭىزدى. كەز كەلگەن مەملەكەت باسشىسى الەم ەلدەرىمەن ديپلوماتيالىق بايلانىستا بولعانى ابزال.
حالىقارالىق قاۋىمداستىق تا قىتاي مەن ا ق ش اراسىنداعى قارىم- قاتىناستىڭ رەتتەلۋىن كۇتەدى.
ءسوزدى تۇيىندەي كەلە، دجو بايدەن دە جىلى قاباق تانىتىپ، الداعى ۋاقىتتا ەكى ەل اراسىندا قاقتىعىستىڭ بولمايتىنىن ەسكەرتتى. دەسە دە ۆاشينگتوننىڭ تايۆانعا قاتىستى كوزقاراسى وزگەرمەگەنىن ايتىپ، قىتايدىڭ ارالعا باسىپ كىرمەيتىنىنە ءۇمىتتى ەكەنىن جەتكىزدى.
دجو بايدەن، ا ق ش پرەزيدەنتى:
- قىرعي- قاباق سوعىس بولماۋى كەرەك. بۇل ماسەلەنى شي جينپيڭ مىرزامەن ءبىراز تالقىلادىق. بارىنشا اشىق اڭگىمە بولدى. ساۋداداعى ماسەلەلەر دە وڭاي شەشىمىن تاباتىنىنا سەنىمدىمىن.
24.kz
